Reportajen David da Costa Gusmao
Porta voz Komandu Jerál Polisia Nasinal Timor-Leste ( PNTL), Superintendente Polísia, Arnaldo de Araújo husu ba komunidade ho joventude sira atu hakmatek iha idak-idak nia fatin no servisu hamutuk ho seguransa hodi kria estabilidade iha nasaun ida ne’e.
“Situasaun real iha Timor laran tomak, iha kapital Dili infrenta hela situasaun de kalamidade. Resolusaun Governiu no 32/2021 de 9 de Abril, no ita iha hela situasaun Covid-19”, dehan porta Voz Komandu Jerál PNTL iha komandu munisipiu Kaikoli, 13/04.
Nia haktuir ho ida ne’e komandu jerál PNTL husu ba komunidade ho Juventude sira atu hakmatek no kalma iha ida-idak nia fatin.
“Haree ba situasaun agora dadauk ita iha hela situasaun kalamidade no covid-19. Ita hotu atu kumpri nafatin distansia sosial/halibur malu no uja maskara”,Arnaldo hatutan.
Nia dehan tan situasaun agora dadaun ne’e husik nain ulun boot sira maka rezolve. Komandu jerál husu ba komunidade tomak atu servisu hamutuk ho seguransa hodi kria estabilidade iha nasaun ida ne’e.
