Home EduTek ESG 05 de Maiu Prepara Materia Ezame nian Ba Estudantes Hodi Estuda...

ESG 05 de Maiu Prepara Materia Ezame nian Ba Estudantes Hodi Estuda Iha Uma

335
0
Diretor Eskola Sekundaria Jeral (ESG), 05 de Maiu Bekora, Manuel Verdial. [Foto: Joselina | 02.05.2021]

Reportazen Joselina dos Santos

Situasaun Serka Sanitaria fo impaktu ba atividade prosesu aprendizajem, Neon Metin halo entrevista ho Diretor Eskola Sekundaria Jeral (ESG), 05 de Maiu Bekora, Manuel Verdial hamutuk ho estrutura prepara rezumu materia ba ezame nian, ba estudante sira maske iha tempu serka sanitaria nia laran.

Direitor Manuel Verdial hatete, bazeia ba surtu COVID-19 ne’ebe hahu akontese iha 2020, hanesan referensia bo’ot ba eskola 05 de Maiu, tanba ne’e mak sira tau atensaun prioridade ba jestaun pedagozia  sira iha antesipasaun hodi orienta professores sira katak tinan 2021 sira tenki prepara materia la’os trimestral maibe ba anualmemte tenki prepara.

“Ita nia orientasaun ba estudante sira, materia ne’ebe ita rezumu ba estudante sira ita tenki agrupa tiha kedas materia primeiru no segundu, terseiru trimestre, atu nune’e ita fo ba estudante sira enkuantu akontese mak ita nia  krize COVID-19 kuandu sei akontese kontinua estudante sira laiha tan reklamasaun ida katak, ami materia laiha no ami lakon total,” dehan Direitor Manuel Verdial ba Neon Metin iha nia kna’ar fatin ESG 05 de Maio 30/4.

Nia dehan estudante barak mak familiar ona ho telefone no media sosial, maibe nia obstaklu mak materia sira ne’ebe manda, sira aprende ka estuda ka lae, no triste mos tanba estudante balun laiha iha telefone, susar ba sira atu asesu materia.

Nia informa estudante eskola 05 de Maio materia kuaze hotu ona, tanba antes loron 9 Marsu iha Serka Sanitaria nia laran, professores sira prepara ona pontus ezame ba estudante sira iha Primeiru trimester. Ezame mak seidauk la’o tanba dadaun ne’e professores sira haruka estudante sira ba eskola atu reviu fila fali ba materia segundu trimestre ho terseiru.

“Ne’e duni ami verifika fali ba estudante sira ne’ebe balun hela iha mota ibun no balun hela iha ne’e,  maibe ba eskola 05 de Maiu, ha’u hanoin laiha problema ida so problema maka lockdown ne’e afeita ba sidade Dili, ita prontu fo ezame ba estudante sira kualker tempu tuir Ministeriu Edukasaun nia kalendariu ne’ebe iha,” dehan Diretor Manuel

Estudante Eskola Sekundaria Geral (ESG), 05 de Maio total hamutuk rihun rua atus ida tolunulu resin neen (2.136), maka prepara-an atu tuir ezame primeiru trimestri.

“Husu ba estudante sira akompana media sira, hodi haree programa governu nian tanba sei mosu faze importante ne’ebe fo governu fo sai,  kuandu to’o loron 16 Maio maka governu iha informasaun katak moras ne’e menus no la aumenta ona, entaun ita bele halo rekuperasaun no hala’o fali ita nia eskola no tuir fali ezame primeiru trimestri, liu-liu ba estudante 3 terseiru ano sira prepara aan ba ezame nasional,” dehan Manuel

Iha parte sorin Professor Simao de Jesus haktuir tan katan bazeia ba situasaun ne’ebe akontese iha ita nia rai laran, alende mos mundu seluk, nudar sidadaun kumpri regulamentu no rona mos Ministeru Edukasaun despaixa karta  katak professores sira tenki elabora  materia ba estudante sira hodi bele estuda iha uma.

Print Friendly, PDF & Email

LEAVE A REPLY

Please enter your comment!
Please enter your name here