Reportajen Santina Lucia da Costa
Alumni Parlamentu Foinsa’e Timor-Leste (APFTL) organiza workshop kona-ba sosializasau atividade “hakerek perfil no foinsa’e istória inspirador” serbisu hamutuk ho Sekretáriu Estadu Juventude Desportu (SEJD) no atividade ne’e serbisu besik liu ho media nasionál sira, hodi prodúz istória no publika liu husi Televisaun, Rádiu, Jornál no web news.
Iha workshop refere Prezidente APFTL, Zaulino Gomes da Silva hateten tinan ida ne’e Alumi Parlamentu Foinsa’e Timor-leste, serbisu hamutuk ho SEJD, iha atividade ho naran oinsá atu hakerek Perfíl joven sira nian ka istória susesu joven sira nian.
“Oinsa mak ita atu buka tuir ita nia maluk joven sira ne’ebé mak halo ona sira nia atividade iha area negósiu no area social sira ne’ebé mak lori mudansa ekonomikamente ba sira nia vida no lori mós mudansa ba fó mos serbisu ba sira nia-an, no fó serbisu ba ema seluk, halo mudansa iha komunidade.” hateten Prezidente APFTL, Zaulino Gomes da Silva, iha salaun Magna SEJD, Lecidere, Dili, 25/6.
Prezidente APFTL hatutan ita presiza foka sai sira nia istória sá mak sira halo ona, no públiku presiza hatene, atu halo ida ne’e só media mak bele halo sasan sira ne’e, tantu liu husi istória narrativa ka bele liu husi halo produsaun video.
Zaulino dehan ho ida ne’e, faze ohin mai halo introdusaun badak ida ho workshop ki’ik ida ba media sira, atu bele hatene prosesu hotu, sá mak APFTL no SEJD nia hakarak.
Nia informa hafoin workshop hotu, fila-fali ba atu halo desizaun iha ida-idak ninia media rasik, atu desideaplika ba atividade ne’e ka lae, atu aplika sei iha prosesu selesaun ida atu media balun selesionadu bele hakerek hodi halo serbisu ida ne’e, no sei iha kontratu entre parte ida-idak sei halo ninia responsabilidade.
“Ami APFTL foin primeira vez atu halo ida ne’e ho SEJD, entaun ami ladun esperiensia di’ak ida iha asuntu media nian, ami ladauk iha esperiénsia ne’ebé kle’an iha media ninia serbisu,” tenik Zaulino.
Iha fatin hanesan Diretór Jeral SEJD, David Tomas de Deus hateten media hatene liu, dalabarak ita nia sosiedade ema prega liafuan sira nakarten ba ita nia joven sira, no ema mós haluha tiha buat lubuk ida mak joven sira halo hodi kontribui ba rai ida ne’e.
Diretor Jeral SEJD, David Tomas de Deus, afirma uluk ita prosesu luta ita nia joven sira mos kontribui ba rai ne’e, to’o ohin loron hetan di’ak joven sira kontinua halo ida ne’e, maibé dalabarak ita ladun publika sai buat ida ne’e, ita atu hakarek sai para depois bele mos fó inspirasaun, motivasaun ba joven sira seluk, para atu hateten katak, sira seluk bele sai hanesan ne’e, bele hetan susesu tanba sá maka hau labele.
“SEJD laiha rekursu ne’ebé mak iha espesialidade ba ida ne’e, entaun serbisu hamutuk ho APFTL para bele organiza ida ne’e, no APFTL mós laiha rekursu entaun ita rekoñese media sira maka iha koñesimentu di’ak kona-ba ida ne’e, oinsá atu hakerek dokumentu ida ho di’ak no kualidade tuir saida mak ita boot sira hatene liu.” dehan Diretor Jeral SEJD.
