Reportajen Francisco JDA
Relasiona ho planu Ministériu Ensino Superior Siénsia no Kultura ( MESSK) ne’ebé sei harii sidade universidade iha Aileu, Suku Bandudati, Aldeia Mantane maibé komunidade hamutuk uma kain 27 sente la satisfás, tanba maske halo dialogu ho komunidade ba dala 14, maibé la iha solusaun no la iha komunikasaun mak di’ak, ho nune’e komunidade suku Bandudati husu governu halo sidade iha rai Mauxadu, ho rai hectares 66.
Ho asuntu ne’e jornalista Neon Metin konfirma kedas ho Ministru Ensino Superior Siénsia no Kultura ( MESSK), Longuinhos dos Santos hatete katak, iha prosesu ne’e halao uluk mak levantamentu dadus, no halo konsolidasaun konsulta alargada ho komunidade no autoridade lokál, inklui veteranu sira, agora faze ikus mak tama ona iha indemizasaun no reajustamentu ho dadus ba komunidade afetadu sira.
“Ita halo levantamentu dadus hotu mak ita públika, depois iha públika ne’e mak komunidade sira halo reklamasaun tuir lei haruka, durante fulan ida, hirak ne’e hotu los ona prosesu ba asinatura ha’u lori ona bá Konsellu Ministru halo rezolusaun para ba indenimizasaun ba komunidade ne’ebé afetadu, final ne’e sira hein indenimizasaun,” hatete Ministru Longinhos dos Santos hafoin remata ekontru Konsellu Ministro iha Palásiu Governu, 14/07
Bainhira Neon Metin husu kona ba se karik komunidade sai sira ba hela iha ne’ebé ? Ba Neon Metin Ministro ne’e hatan katak “baibain nia lalaok primeiru kuandu interese nasionál ba estadu nian iha buat rua, governu halo indenimizasaun sira buka fatin rasik, se sira lakohi governu prepara fatin halo uma tuir tipu uma ne’ebé mak iha, sira bele ba hela, mais rua ne’e lakohi hotu ikus mak lori governu ba Justisa, iha asuntu ida ne’e se kuandu entidade balun ne’ebé mak atu hato’o ba Justisa ne’e hasoru Ministériu Justisa, tanba MESSK antes aprezenta iha Konsellu Ministro ba indenimizasaun nian, hetan paraser pozitivu hosi Ministériu Justisa”.
Nia realsa tan, dadaun ne’e iha ona faze indenimizasaun ba komunidade afetadu sira.
