Total populasaun iha Posto Administrativu Don Aleixo hamutuk 85,270 mil populasaun. Hosi total populasaun ne’e, ema ne’ebe simu ona vasina iha posto Don Aleixo hamutuk 36,305 populasaun no seidauk simu hamutuk 48,965.
Ministra Saude (MS) liu husi Komisaun Interministeriál ba Implementasaun Vasina COVID-19 iha Timor-Leste, ohin hala’o abertura ba planu kampaña vasinasaun ba komunidade iha Sede Suku Bairo-Pite, Posto Administrativu Don Aleixo, Munisípiu Dili.
Reprezentante Komisaun Interministeriál ba Implemetasaun Vasina COVID-19 iha Timor-Leste, Dr. Elio Guterres enkoraja komunidade sira iha sede suku Bairo-Pite, atu hakbesik an ba iha centro saúde sira ne’ebe besik, hodi simu vasina atu nune’e bele prevene an husi virus refere.
“Hau hakarak enkoraja de’it ba komunidade sira iha ne’e, atu bele mai simu vasina hodi bele prevene ita nia an husi virus COVID-19. Ita haree ita nia nasaun viziñu sira mate barak, entaun liu husi vasina ida ne’e ita bele prevene an husi COVID-19 atu labele hada’et ba ita no ita nia maluk sira seluk”, dehan Dr. Elio iha Sede Suku Bairo Pite, Kuarta 21/07.
Iha fatin hanesan Sekretáriu Adjuntu Munisipiu Dili, Antonio Clão hateten governo ne’ebé liu husi Ministra Saude (MS) ho nia ekipa tomak ne’ebe prontu suporta autoridade komunitária no lao hamutuk hodi hakbesik-an nafatin ba komunidade atu bele halo vasina ba komunidade sira.
Nia salienta tuir dadus ne’ebe iha total populasaun iha Posto Administrativu Don Aleixo hamutuk 85,270 mil populasaun. Hosi total populasaun ne’e, ema ne’ebe simu ona vasina iha posto Don Aleixo hamutuk 36,305 populasaun no seidauk simu hamutuk 48,965.
Iha suku Bairo pite ema hamutuk 27,228 mil populasaun, no sira ne’ebé simu ona vasina ne’e hamutuk 11,921 no seidauk simu vasina hamutuk 15,307.
Entretantu Komisaun Interministeriál ba Implemetasaun Vasina COVID-19 iha Timor-Leste, hala’o Kampaña vasinasaun ba iha suku Bairo-Pite ho nia aldeia hamutuk 25 aldeias, ne’ebe mak pretense ba iha posto Don Aleixo munisipiu Dili no Kampaña ne’e halo uluk ba aldeia 9, aban kontinua ba aldeia 9 no loron tuir mai kontinua ba aldeia 8. Bainhira kampaña ne’e remata, Komisaun Interministeriál ba Implemetasaun Vasina COVID-19 kontinua kedas halo vasinasaun ba komunidade sira iha sede suku refere.
