Home Saude Kauza Husi Tabaku, Taxa Mortalidade iha TL Sae Ba 45% Kada Tinan

Kauza Husi Tabaku, Taxa Mortalidade iha TL Sae Ba 45% Kada Tinan

941
0
ilustrasaun tabaco. [Foto: copyright google | 04.06.2021]

Reportajen Santina Lucia da Costa

“Timor-Leste sai hanesan taxa fuma aas iha mundu, solusaun mak presiza governu reforsa lei tabaku nian, no aloka rekursu sira ne’ebé adekuadu ba kombate tabajismu no hasa’e taxa folin tabaku nian, hodi hamenus asesibilidade hosi foinsa’e sira”. Sancho Belito Fernandes

Aliansa Nasionál Kontrolu Tabaku Timor-Leste (ANCT-TL) ho Forum NGO Timor-Leste (FONGTIL) realiza semináriu ho tema “Hasa’e Taxa Tabaku ba Timor-Leste Saudavel” ho objetivu hodi aprende kona-ba efetividade sistema taxa tabaku hosi nasaun selu, hodi dezenvolve polítika taxa tabaku ne’ebé efetivu ba governu Timor-Leste.

Tuir Diretór ANC-TL, Sancho Belito Fernandes hateten globalmente tabaku oho ema millaun 8 kada tinan no sai hanesan fatin risku potensiál ho moras ne’ebé la hada’et hanesan moras kankru, diabetes, atakasaun fuan, stroke, króniku pulmaun no seluk tan, moras la hada’et hanesan kauza prinsipál ba taxa mortalidade iha Timor-Leste ne’ebé sa’e ba 45% ema mate kada tinan.

“Moras la hada’et  sai hanesan kauza prinsipál ba taxa mortalidade iha ita nia rai, ne’ebé responsavel ba 45% ema mate kada tinan, tuir relatóriu espesialista 2018 ema 354 hosi kazu diabetes, 745 kazu kardíaku ka moras fuan ne’ebé vistu iha Ospitál Nasionál Guido Valadares (HNGV) besik 11% ka ema ida no rua kada loron baixa tanba moras stroke.” informa Diretór ANC-TL iha JL Vila, 04/08.

Diretór ANC-TL relata katak tuir relatóriu ba moras la hada’et iha tinan 2016-2019 hosi Organizasaun Mundial Saúde (OMS) hatudu taxa mortalidade ba moras la hada’et hamutuk 3.300 tinan tolu de’it tanba ema mate no piór ka susar liu tan  20% ema mate prematura ka mate sedu.

Sancho akresenta Timor-Leste sai hanesan taxa fuma aas iha mundu, solusaun mak presiza governu reforsa lei tabaku nian, no aloka rekursu sira ne’ebé adekuadu ba kombate tabajismu no hasa’e taxa folin tabaku nian, hodi hamenus asesibilidade hosi foinsa’e sira “hau hanoin ne’e mak solusaun kuandu ita hotu-hotu kombate no proteje Foinsa’e sira.”

Iha fatin hanesan Diretór Jerál Autoridade Aduaneira Alfándega, José Abilio Fatima hateten tabaku hanesan fatór risku importante ema nia vida, no Timor-Leste rasik asina ona konvensaun kuadru legal  OMS ba tabaku iha 25 Maiu 2004 no ratifika iha 22 Dezembru 2004 maibé TL númeru kontinua aas.

“Dadus ne’ebé ita rekolla iha ita nia sistema total kilograma importasaun tabaku iha tinan 2020 hamutuk 866.426.05 kilograma no iha tinan 2021 hahu fulan Janeiru-Jullu 463.566.000 kilograma, signifika ita nia nasaun konsumu tabaku maka’as tebes.” Informa Diretór Jerál Autóridade Aduaneira Alfándega.

Nia dehan atu redús númeru importasaun meiu ida mak tenke hasa’e folin taxa seletivu konsumu halo boot, maibé lei tributária númeru 8/2008 agora iha hela prosesu revizaun ne’ebé mak autoridade aduaneira ho tributária serbisu hamutuk halo hela revizaun.

“Ita espera katak revizaun bele konsulta hosi sosiedade sivil bele lori ba Parlamentu Nasionál tanba ko’alia kona-ba reseita fiskál ne’e regula ho lei ne’e kompeténsia Parlamentu Nasionál nia sei regula kona-ba persentajen hira.” dehan José Abilio Fatima.

Nune’e, Komisaun F Parlamentu Nasionál ne’ebé trata asuntu Saude, Noe da Silva “Buka Tuir” hateten atu kombate konsumidór tabaku ne’ebé aas mak presiza próteze sidadaun sira husi risku sira ne’ebé mak ita nia sidadaun sira hasoru.

Nia reforsatan atu prevene ida ne’e, mak liuhusi sensibilizasaun ba sidadaun sira hodi bele hatene kle’an kona-ba risku husi fuma, no liuhusi formasaun ka seminar sira, sei la liu husi meius rua ne’e, difisil tebes atu hatun taxa mortalidade ne’ebé efeta husi fuma.

Noe esplika iha artigu 57-61 fó liberdade ba sidadaun sira iha relasaun ho saúde no meiu ambiente maibé la taka dalan mós ba estadu liuliu ba Parlamentu Nasionál hodi estabelese lei ruma, hodi bele proteje sidadaun sira liu hosi fuma tabaku ne’ebé maka’as tebes.

“Tuir rejime kontrolu tabaku dekretu lei 14/2016 8 Juñu Timor-Leste, sai hanesan nasaun ne’ebé porsentu boot tebes ba fuma, ne’e hatudu mai ita katak, ita iha hela númeru risku aas, tanba ne’e presija ita hotu nia preokupasaun atu asegura família, hodi livre husi fuma no presiza hasa’e taxa tabaku hanesan agora tabaku kada kilograma $19 dollar, prefere  bele hasa’e taxa  tabaku kilograma pelu menus 30% ka 25 %.” informa Noe da Silva.

Liu husi semináriu refere, halo lansamentu mós ba livru hasa’e taxa tabaku ba TL saudavel oinsa ba oin bele halo kontrolu tabaku ho di’ak.

Print Friendly, PDF & Email

LEAVE A REPLY

Please enter your comment!
Please enter your name here