Reportajen David da Costa Gusmao
Ministériu Saude (MS) halo advokasia no kampaña vasinasaun COVID-19 ba komunidade sira iha postu administrativu Railaku, munisípiu Ermera tanba haree ba kazu COVID-19 aumenta iha Ermera, tanba ema nia partisipasaun iha tasa vasina menus liu.
Vise Ministru Saúde, Bonifásiu Maucoli hateten iha loron haat nia laran mai to’o ohin loron, kazu COVID-19 sae makaas los iha Ermera, tanba ne’e mak presiza reforsa halo advokasia ka sensibilizasaun ba iha lider komunidade sira, depois sira iha ona konsensia, atu nune’e sira bele tun ba iha sira nia suku no aldeia hodi mobiliza sira nian komunidade hodi simu vasina.
“Tanba medida prevensaun sira uluk halo ona uza masker, distánsia sosiál, no fase liman beibeik maibé kazu ne’e aumenta nafatin iha Ermera, ho ida ne’e governu liu husi Konsellu Ministru hasai regulasaun para halo serka sanitaria ba postu administrativu Ermera no postu Railaku no komfinamentu obrigatóriu”, dehan Vise Ministru Saude, iha Railaku Munisipiu Ermera, 04/08.
Nia dehan kompara ho programa imunizasaun ba COVID-19, Ermera mak minimu-liu husi munisípiu sira seluk, foin atinje 9000 vasina, entaun presiza reforsa liuhusi advokasia no sensibilizasaun ba lider komunitáriu no komunidade sira
Nia haktuir governu sei esforsu makaas hodi envolve lider komunitáriu sira no igreja tanba sira nia papel importante oinsá atu bele hato’o informasaun ne’ebe loloos, atu nune’e ema hotu iha konxiénsia katak vasina ne’e importante ba sira nia isin, hodi kria imunidade para bele hasoru virus ne’ebe sirkula hela iha Ermera.
Iha fatin hanesan Autoridade Munisípiu Ermera, Eujivio Salsinha hateten, tasa vasina iha Ermera menus liu 12% kompara ho Dili, tanba falta sensibilizasaun, tanba mos komunidade sira rona liu informasaun falsu ka hoax, ne’ebe lansa iha media sosial.
Liuhusi sensibilizasaun ne’e hetan partisipasaun husi husi autoridade Munispiu Ermera, autoridade lokal no komunidade iha suku neen iha postu administrativu Railaku. Iha tempu hanesan ekipa saúde kontinua hala’o programa vasinasaun ba komunidade sira.
Nune dadus ba kazu COVID-19 ba loron 04 Agusto nian Ministeriu Saude deteta kazu foun iha Ermera nain ida, kazu ativu iha Ermera total 589, rekuperadu hamutuk 147 no kazu konfirmadu iha Ermera hamutuk 736
