Home Notisia Estudante Timor Iha Nasaun 4 Enkoraza Milena Pires Kandidata-an ba Prezidente Republika

Estudante Timor Iha Nasaun 4 Enkoraza Milena Pires Kandidata-an ba Prezidente Republika

2229
0
Milena Pires. [Foto: Copyright google | 09.09.2021]

Reportajen Zevonia Vieira

“Ami fiar katak bainhira sai Xefe Estadu, Milena Pires sei iha komitmentu atu sentraliza joven sira-nia interese iha politika dezenvolvimentu nasionál, reforsa no promove lei ne’ebé proteje feto no labarik sira, no promove nesesidade atu haforsa setór edukasaun, saúde no dezenvolvimentu rai laran”, Ricardo Valente

Estudante Timoroan iha Cambodia, Malazia, Tailandia no Vietanm enkoraza no fo apoiu ba eis Embaixadora Timor-Leste ba Nasoins Unidas, Milena Pires hodi kandidata-an ba Prezidente Republika periodu 2022-2027.

Liuhusi komunikadu imprensa ne’ebe Neon Metin asesu estudante timoroan ne’ebe halo estudu iha nasaun haat deklara katak intensaun atu enkoraja no apoia ba eis-embaixadora Timor-Leste ba ONU, Milena Pires atu kandidata-an ba Prezidente República períodu 2022-2027, tanba tempu to’o ona atu timoroan propoin figura foun ne’ebé bele lori esperansa foun ba foin-sa’e sira.

“Hanesan foin-sa’e, ami orgullu sai timoroan no onradu reprezenta rai doben iha nasaun estranjeiru. Maske la fásil no liu husi difikuldade oi-oin, ami uza oportunidade sira ne’e hodi bele avansa ami-nia estudu no kapasita ami-nia an ho objetivu atu dezenvolve ita-nia rai. Maibe hare’e ba krize sosiál, polítika no ekonómika iha nível alarmante iha ita-nia rai laran, ami sente iha obrigasaun hanesan sidadaun atu hato’o ami-nia hanoin no suporta mudansa iha rai-laran, hodi hakarak atu enkoraja lider foun ida iha eleisaun tinan oin mai”, hateten portavós Ricardo Valente, via komunikadu imprensa, 28/09.

Nia hatutan hafoin tinan 21, presija husu se lós mak hetan benefisiu husi dezenvolvimentu iha rai laran? Nia dehan ami foin-sa’e barak, tantu iha rai liur ka rai laran mak ladún kontente no lakon ánimu ho situasaun polítika atuál iha Timor-Leste.

“Ami sente katak polítika ohin loron ladún hakuak juventude sira-nia interese, no ami-nia maluk foin-sa’e barak iha ita-nia rai mak kontinua la hetan asesu ba oportunidade oin-oin. Maske ami foin-sa’e konstitui maioria populasaun iha Timor-Leste, ami kontinua sente eskluidu husi programa dezenvolvimentu, no ignoradu iha negosiasaun sira konabá futuru nasaun nian, no laiha reprezentasaun polítika ne’ebé bele rona foin-sa’e sira nia lian no preokupasaun”, nia dehan

Nia haforsa liután katak ohin loron, ami-nia jerasaun hasoru dezafiu bo’ot ne’ebé joven iha mundu tomak enfrenta iha nível global la iha kampu de traballu, no hasoru dezigualdade no krize ekonómika, violénsia iha forma oin-oin, liliu violénsia hasoru feto no labarik, ameasa husi mudansa klimátika, kualidade ba edukasaun no saúde ne’ebé fraku no agora daudaun problema hirak ne’e sai piór liután ho pandemia COVID-19.

Dezafiu hirak ne’e la sees husi obstákulu ne’ebé foin-sa’e sira iha Timor-Leste mós enfrenta. Ida ne’e loke ami-nia matan katak benefisiu husi dezenvolvimentu rai laran seidauk halo mudansa signifikativu ba juventude sira-nia moris.

Ho problema kompleksu sira ne’e ezije líder ida ne’ebé, aléin de iha esperiénsia servisu iha nível global, entende diak importánsia husi papél Estado nian atu responde ba kestaun urjente ne’ebé jerasaun foun sira enfrenta dadauk.

Portavós ne’e hateten durante nia knaar hanesan Embaixadora iha ONU, Milena Pires kontribui atu hetan rekoñesimentu boot liu ba nesesidade sira ne’ebé nasaun ki’ik sira hanesan Timor-Leste hasoru, ho mos importânsia kooperasaun multilateral atu atinje dezenvolvimentu sustentavel no hari’i sosiedade ida ne’ebé forte, egalitáriu, justu, no inkluzivu.

“Ami fiar katak bainhira sai Xefe Estadu, Milena Pires sei iha komitmentu atu sentraliza joven sira-nia interese iha politika dezenvolvimentu nasionál, reforsa no promove lei ne’ebé proteje feto no labarik sira, no promove nesesidade atu haforsa setór edukasaun, saúde no dezenvolvimentu rai laran, nu’udar diplomata ida ne’ebé servisu ona iha forum alto-nivel hanesan ONU, ami fiar katak  Milena Pires iha abilidade kle’an atu bele defende no promove Timor-Leste nia interese iha nível internasionál no mos serbisu ho orgaun soberanu iha Timor-Leste ho maneira efetivu, imparsiál, no nu’udar ema independente sei laiha presaun husi interese partidu atu atinje ita-nia objetivu komún”, nia dehan

Ba estudante timoroan sira ne’ebe kontinua hela estudu iha nasaun haat refere hateten Ita presiza líder foun ne’ebé bele lori esperansa ba foin-sa’e sira, no ba ema hotu la haree ba nia afiliasaun polítika ka husi ne’ebé. Ita presiza lider foun ne’ebé bele halo advokasia maka’as kona-ba fó protesaun ba feto no labarik, ema ho defisiénsia sira, komunidade LGBTQ no grupu vulnerável sira seluk, atu sira bele sente livre no seguru iha sira-nia moris loroloron liu-liu iha espasu públiku. Ita hotu presiza lideransa foun ida ne’ebé bele luta ba direitu umanu hodi kria sosiedade ida ne’ebé justu, inkluzivu no livre husi disrikiminasaun”.

Print Friendly, PDF & Email

LEAVE A REPLY

Please enter your comment!
Please enter your name here