Reportajen Francisco JDA
Ministru Prezidénsia Konsellu Ministru, Fidelis Leite Magalahes hala’o konferensia imprensa relasiona ho falesimentu Max Stahl ne’ebé ohin hakotu ona nia iis iha Brisbane-Austrália, tanba sofre moras ne’ebé hetan kleur ona no iha loron ne’ebé hanesan bainhira selebra tinan 30 ba Saudozu Sebastião Gomes nia mate.
Nia dehan lori governu no povu Timor-Leste nia naran, hato’o sentidu kondolénsias ne’ebé klean tebes ba família, amigo estimadu Max Stahl no afirma katak povu Timor-Leste nafatin lembra ba ninia kontribuisaun ba autodeterminasaun nasionál
“Kona ba detalhas no serimonia sira mak talvez sei halo, sei depende ba konfirmasaun hosi falmila em lutada, momentu ida ne’e parte governu nian akompaña hela bainhira komunikasaun ho família em lutada iha Brisbane, liuliu kaben mana Indri atu sira bele konfirma desizaun familia nian, oinsá serimónia, saida mak atu halo no lori mai Timor karik bainhira, hirak ne’e sei hela ho parte governu nian,” hatete Ministru Prezidensiál Konsellu Ministru Fidelis Leite Magalahes iha nia knaar fatin Palacio do Governu, 28/10
Nia dehan memória Max Stahl iha fulan Novembru 1991, nia akompaña marxa omenajen hosi Motael to’o rate Sebastiao Gomes ne’ebé to’o hamosu masakre Santa Cruz, iha ne’ebé timoroan atus ba atus militár Indonézia oho, imajen sira ne’e daet ba mundu tomak hatudu ba mundu tomak kona ba Direitus umanus iha Timor-Leste
Christopher Wenner koñesidu liu ho naran Max Stahl moris iha loron 6 fulan Dezembru tinan 1954 iha Reinu Unidu, nune’e ninia profisionalizmu no nia korajen ne’ebé boot tebes, fundamental ba frente diplomátika rezisténsia timoroan nian ne’ebé lori Timor-Leste ba pájina dahuluk meiu komunikasaun sosiál mundiál, hafoin tinan barak iha ne’ebé opiniaun públika mundiál nian, nune’e Max Stahl entervista dahuluk mak hanesan Komandante David Alex Daitula no komandante Nino Konis Santana.
