Home Notisia Siklone Seroja, Uma Kain 1275 Iha Laclubar Lakon Sira nia To’os, Animal...

Siklone Seroja, Uma Kain 1275 Iha Laclubar Lakon Sira nia To’os, Animal no Plantasaun

777
0
lider komunitaria hosi suku 6 iha Laclubar halo konferensia imprensa. [Foto: Adroaldo | 03.05.2021]

Reportazen Adroaldo ‘Saretukau’

Lider lokal hosi suku neen hanesan Suku Orlalan, Batara, Manelima, Funar, Fatumaquerec no Sanana’in no aldeia 29 iha Postu Administrativu Laclubar, husu governu atu distribui mos apoiu emerjénsia ba komunidade afetadu sira ne’ebé lakon sira nia to’os no plantasaun durante dezastre natural siklone seroja, tanba komunidade barak mak lakon sira nia animal, ai-horis, ai-han ne’ebé sustenta sira nia moris durante ne’e.

Iha konferénsia imprensa, Porta Voz suku neen Xefe Suku Orlalan, Carlos José Alves hato’o katak durante akontesimentu siklone seroja iha loron 4 Abril la’os estraga de’it komunidade nia uma, maibé estraga mos komunidade sira nia to’os no plantasaun sira.

“Komunidade ne’ebé afeta ba dezastre naturais la’os uma de’it. Uma mak ekipa verifikasaun verifika ona hetan 474, maibé komunidade ne’ebé afeta ba agrikultura mak uma kain 1275, lakon plantasaun, ai-han nomos animal sira, to’o agora seidauk hetan intervensaun hosi parte governu”, hateten Porta Voz Suku neen iha Edifísiu administrasaun Postu Laclubar Segunda 03/05.

Porta voz ne’e hatutan katak relatóriu sira hato’o hotu ona ba parte kompetente sira, hodi fo mos apoiu ba populasaun Laclubar, ne’ebé hetan estagus ba plantasaun tanba sira nia moris depende ba to’os.

“Relatóriu hotu kada suku relata ona ba iha administrasaun postu para atu relata kontinua ba iha nasional para bele hetan mos atensaun ba ita nia povu ne’ebé mak sempre dependente ba to’os, tanba populasaun Laclubar maioria moris ho vida agrikultura, sira halo to’os, ko’a tua, tempu kafé sira ku’u ba fa’an, maibé kuaze mota no rai halai estraga total populasaun sira nia plantasaun nomos ai-horis sira”, dehan Carlos

Nia hatutan relatóriu agrikultura nian  hato’o ona ba estensionista maibé to’o agora seidauk hetan apoiu ruma ba família afetadu sira ba estragus ne’e.

Iha fatin hanesan Administrador Postu Administrativu Laclubar, Natalino Martins de Carvalho hato’o katak akontesimentu ne’e halo komunidade barak mak lakon sira nia fontes hahan no rendimentu durante sira nia moris.

“Konabá to’os no natar ne’ebé mak ita nia komunidade sira utiliza durante tempu naruk hodi sustenta moris nian. Maioria populasaun Postu Administrativu Laclubar moris ho to’os, for a hosi ne’e sira nia rendimentu hosi kafé no tua. Maibé ho situasaun ida ne’e, sira nia plantasaun barak mak estraga, li-liu ba plantasaun kafé no tua ne’ebé sira te’in hodi hetan osan hodi nune’e bele sustenta sira nia vida”, hateten Administrador Natalino.

Iha parte sorin komunidade afetadu, Antonino Paulo Soares hosi Suku Batara konfesa katak hosi siklone sejora ne’e nia lakon animal, to’os no ai-horis sira tanba estraga hotu.

“Hosi animal kesi, animal ne’ebé husik ami ba haree lakon hotu, tanba rai dada hosi foho leten mak tun, ne’ebé, rai dada hotu buat sira ne’e. Pois to’os laran hanesan plantasaun, ai-oan sira ne’ebé estadu fó, ida ami halo rasik bibit, ne’ebé mai kuda rasik hanesan privadu ne’e ba hotu”, haktuir Antunino ho triste.

Nia hatutan ni-nia kafé no ai-oan sira seluk ne’ebé kuda iha rai lolon hodi tahan rai halo metin no atu rai hela ba oan sira nia future mos estraga hotu, tanba rai fila tiha ba rai henek mutin.

Antonino husu atu governu tulun netik sira ba dezastre ne’e, “ami la’os atu obriga governu maibé estadu Timor-Leste hanesan ami nia inan-aman, buat ne’ebé akontese ba ami, depende ba na’i ulun sira tanba plantasaun ne’ebé ami kuda estraga hotu. Atu hakiak animal mos ami book aan la di’ak”.

Print Friendly, PDF & Email

LEAVE A REPLY

Please enter your comment!
Please enter your name here