Home Notisia Siklone Seroja: SEPS Distribui Apoiu Emerjensia Ba Komunidade Afetadu Iha Laclubar

Siklone Seroja: SEPS Distribui Apoiu Emerjensia Ba Komunidade Afetadu Iha Laclubar

268
0
SEPS entrega sasan ba komunidade afetadu iha Laclubar. [Foto: Adroaldo | 03.05.2021]

Reportazen Adroaldo ‘Saretukau’

Governu liu hosi Sekretária Estadu Protesaun Sivil (SEPS), distribui ajudus umanitáriu ba komunidade afetadu hosi Siklone Seroja iha Postu Administrativu Laclubar, Munisípiu Manatuto. Apoiu hirak ne’e to’o iha Postu Administrativu Laclubar iha loron 23 Abril ho helicopter N365JA Australia.

Iha serimónia distribuisaun ne’e, Sekeretária Estadu Protesaun Sivil, Joaquim G. R. Martins hatete inundasaun iha loron 4 Abril iha Munisípiu Manatuto, Postu rua mak sofre maka’as liu mak Laclo ho Laclubar, tanba ne’e iha prezensa ne’e nia sauda no distribui ajudu umanitáriu ba vítima afetadu sira.

“Ohin ita mai konsentra iha Postu Laclubar, ita prepara ona hodi fo apoiu ba 391 famílias ne’ebé mak iha, ita sei kompleta tan to’o iha 474 famílias para bele apoiu ida ne’e”, hatete Sekretária Estadu Joaquim iha serimónia distribuisaun ajudus umanitáriu iha Edifísiu Administrasaun Postu Laclubar 03/05.

Nia hatutan ida ne’e apoiu primeiru ne’ebé komunidade sira simu, tuir fali mak sei apoiu rekuperasaun ba konstrusaun uma ne’ebé hetan estragus ,ne’ebé identifika ona hosi autoridade Munisipal to’o nível aldeia.

“Identifika ona númeru uma sira ne’ebé mak aat ho total uma 167 mak hetan estragus. Tanba ne’e, depois de apoiu emerjénsia ida ne’e, ita sei hakat ba faze ida segundu mak faze rekuperasaun, ita sei apoiu fali tan ba uma kain 167 ne’ebé mak uma aat, ita sei apoiu material konstrusaun, maun de obra no mos ai kuadradu, para depois sira bele harii fali sira nia uma ne’ebé mak distruídu durante dezastre” dehan Joaquim Martins.

Iha parte sorin Administrador Postu Administrativu Laclubar, Natalino Martins de Carvalho hato’o agradese wa’in tebes ba vizitasaun Sekretária Estadu Protesaun Sivil hodi distribui apoiu umanitáriu ba inan-aman afetadu sira, hosi dezastre Siklone Seroja ne’ebé akontese iha loron 4 Abril.

“Ita hatene katak situasasaun dezastre ida ne’e la’os afeta de’it ba Laclubar, afeta ba teritóriu tomak, ne’e be ita husik ita nia tempu, bele hakat liu mai ami nia postu hodi hare direitamente saída mak komunidade sira hasoru”, Administrador Postu Laclubar hateten.

Iha sorin seluk administrador Postu Laclubar informa katak dadus ne’ebé sira iha total 345, maibé tanba seidauk halo asesmentu, nune’e hosi autoridade Protesaun Sivil Munisípiu no Postu hafoin asesmentu dadus sa’e fila fali ba 474, ne’ebé sei simu hikas apoiu ida ne’e.

Iha fatin hanesan reprezentate komunidade afetadu Suku Funar, Abílio Martins hato’o sentimentu haksolok tanba parte governu liu hosi Sekretátria Estadu Protesaun Sivil ne’ebé servisu hamutuk ho Mnistériu Solidariedade Sosial no Inkluzaun bele fó apoiu ba sira, wainhira sira hasoru dezastre natural ida ne’e.

“Tanba iha fulan uluk liu ba afeta boot iha Manatuto, Laclubar mos simu terus boot ida. Agora ami sente kontente ajuda hosi família no governu”, hateten Abílio.

Apoiu ne’ebe SEPS distribui mak hanesan nesesidade bazika no sasan uma laran nian, tuir padraun Politika Nasional Jestaun Risku Dezastre nian.

Print Friendly, PDF & Email

LEAVE A REPLY

Please enter your comment!
Please enter your name here