Reportaje Calisto dos Santos Oqui, Francisco Colo
Padre Justino Tanec ohin simu pose hodi Lidera Instituto Superior de Filosofia e de Teologia (ISFIT) Domi Jaime Garcia Goulart Fatumeta husi tinan 2021 to’o 2026.
Reitór foun Institutu Superior de Filozofia e de Teolojia (ISFIT) Domi Jaime Garcia Goulart Fatumeta, Padre Justino Tanec informa, nu’udar ema sempre orgullu buat ne’ebé igreja lokál, liu husi igreja episkopál Timor-Leste haraik mai, atu bele lidera durante períodu ida ne’e.
“Iha hau nia visaun iha tinan lima nia laran, hakarak iha instituisaun superiór ita tenke akumula ema hotu, pelumenus sai imajen ba igreja akualidora, signifika igreja la’os padre sira nian ou madre sira nian, maibe igreja ne’e ema hotu nian, maibe simu batismu ne’e pretensa ba igreja,” Dehan Reitór ISFIT, Padre Justino ba jornalista sira iha Fatumeta, Segunda 22/11.
Nia haktuir iha nia mandatu ne’e koko atu halo imajen universál ou atu loke ba ema hotu, atu hadi’a estrutura no kolabora ho sira ne’ebé mak serbisu iha estrutura ne’e mak Dioseze Dili, Maliana, Baukau no sei hamutuk iha estrutura ne’e, inklui mos padre relijiozu sira.
Nia husu ba estrutura foun atu presiza servisu hamutuk ho estrutura no ema seluk, balun servisu iha ekipa tamba obra maromak ninian katak tenke akumula ema hotu atu servisu hamutuk liu husi dalan edukasaun.
Iha fatin hanesa, Padre Domingos Alves Da Costa nu’udar Reitór tuan iha ISFIT husu ba Retór foun padre Justino Tanec atu hala’o nafatin serbisu ne’ebé di’ak liu tan iha ISFIT.
“Durante tinan 9 hau lidera ISFIT, no ohin loron hau nia misaun hanesan reitór ba institutu superior ISFIT remata ona, ho ida ne’e hau husu ba reitór foun atu hala’o nafatin servisu ne’ebé di’ak liu tan atu bele lidera ISFIT,” nia konklui
