Reportajen Silvino Freitas
Governu Timor-Leste no Ajénsia Kooperasaun Internasionál Koreia (KOIKA) asina akordu $5 millaun atu dezenvolve arkivu dijitál iha Centru Nasionál Chega!
Iha serimónia asina akordu ne’e Ministru Finansa, Rui Augusto Gomes dehan apoiu ne’e ho objetivu atu transforma Centro Nasionál Chega! (CNC) ba kualidade istória ho edukasaun hari dame, nu’udar dalan ida atu haforsa kapasidade nasionál ho rejionál ba rekonsiliasaun konflitu.
“Projetu ne’e ho objetivu atu haforsa, responsabilidade nasionál ho dame, justisa no prosperidade liu husi aprende husi pasadu durante tinan 24 hahú husi 1974 to’o 1999, violasaun direitu umanu no injustisa iha konflitu polítiku tomak,” dehan Ministru Rui Augusto Gomes iha salaun CNC Balide Dili, 22/11.
Nia esplika dijitalizasaun nu’udar xave ida, tanba ne’e VIII Governu Konstitusionál hahú ona inisia instalasaun kabu-submarinu husi Darwin mai Dili, dijitalizasaun Chega sei iha potensialidade ida atu realiza mandatu moral ba ita nia nasaun, no mos demonstra kompromisu boot ba dame no rekonsiliasaun, respeitu direitu no dignidade úmanu iha nasionál, rejionál no nivel global.
“Hau fiar katak bainhira ita hahú projetu ida ne’e ita sei hetan nafatin apoiu, esperiénsia no peritu husi UNESCO ba CNC nu’udar implementador servisu hamutuk ho MEJD” nia dehan.
Ministru Finansas iha esperansa katak CNC sei inisia ho biblioteka eletrónika, dezenvolve jestaun informasaun no sistema arkivu ne’ebé favoravel.
Nia konklui katak biblioteka eletrónika ne’e tenke, sai hanesan odamatan boot ba sidadaun nasionál no estranjeiru, atu bele asesu informasaun importante kona ba istória Timor nian.
