Reportajen Adroaldo ‘Saretukau’
Sekretáriu Estudu Juventude no Desportu (SEJD) halo lansamentu nasionál konaba formasaun ba joven eleitu suku, ne’ebé foka liu ba planeamentu, halo proposta monitorizasaun no relatóriu.
Iha serimónia lansamentu ne’e, Sekretaria Estadu Juventude no Desportu, Abrao Saldanha Nokosiku hateten SEJD iha vizaun ida mak joven millennial forsa kreativa, katak forsa hirak ne’e sai kreativa liu hosi baze.
“Forsa ne’ebé iha kriasaun, kriasaun ne’e rekoñese oinsá mak joven sira iha suku, iha aldeia, iha rural ni-nia kapasidade, ni-nia forsa hodi fo solusaun ba problema sira ne’ebé sira hasoru ne’e rasik”, hatete Sekretáriu Estudu Abrão iha nia diskursu ba lansamentu program joven eleitu suku, iha Postu Administrativu Maliana, Munisípiu Bobonaru, 22/11.
Nia dehan ba ambisaun hirak ne’e, atu sai konkretu mak organizasaun sira iha baze, organizasaun ne’ebé hakbesik liu serbisu públiku, fundasaun ba joven sira iha suku, aldeia atu oinsá mak bele komunika di’ak liu ba problema hirak ba iha governasaun lokál no governasaun sentrál.
Sekretáriu Estudu Abrão hatete joven na’in rua ne’ebé eleitu iha kada suku sai hanesan parseiru principal ho SEJD.
“Kris espasu barak liu tan ba joven sira iha suku no aldeia ne’ebé mak iha sira nia poténsia hodi nune’e bele dinamiza di’ak liu sira ni-nia aktividade no bele kontribui sira nia enerjia ba dezenvolvimentu nasional”, tenik Abrão.
Iha parte sorin Diretór Ezekutivu Sentru Formasaun Juventude Munisípiu Bobonaru, Alcino Lopes, agradese ba SEJD ne’ebé fó fiar ba sira, hodi organiza atividade lansamentu ida ne’e.
“Ho fiar ne’ebé mak SEJD fó mai sentru juventude Munisípiu Bobonaru, hodi responsavel ba atividade nasionál a nivel Munisípiu Bobonaru, reprezenta hosi sentru juventude hitu hanesan Aileu, Ainaru, Covalima, Ermera, Likisá, Manufahi no Viqueque”, hateten Abrao
Nia hatete objetivu hosi joven eleitu ba suku, bele tulun joven sira kontribui ba sira nia suku rasik ho saída mak sira sei aprende liu hosi programa ne’e.
“Oinsá atu kapasita di’ak liu tan ita nia joven eleitu suku sira iha suku ida-idak konabá oinsá halo planu, halo proposta, halo monitorizasaun no halo relatóriu iha ida-idak nia suku, hodi nune’e joven labele sai opozisaun ba ema hotu, lalika sai opozisaun ba governu, maibé oinsá joven sira bele sai solusaun ba problema hotu iha suku ida-idak”, hatete Diretór Ezekutivu Sentru Juventude Munisípiu Bobonaru.
Programa ne’e hetan apoiu másimu hosi SEJD ho montante orsamentu 20.070 (rihun rua nulu resin hitu nulu), fahe ba atividade lansamentu no formasaun joven eleitu suku ne’e rasik. Atividade formasaun rasik sei halo durante loron lima nia laran, hahú hosi loron lansamentu, ba joven 100 hosi suku 50 ne’ebé pertense ba Munisípiu Bobonaru.
