Reportajen Adroaldo ‘Saretukau’
Iha loron 3 Fevereiru 2022, ekipa susesu hosi kandidatura independente, Antero Bendito da Silva rejista ona iha Tribunal de Recurso (TR) Caicoli, ho apoiantes hosi movimentu sosial, juventude, to’os na’in no traballador sira, hamutuk 6.700 resin, hodi kompete iha eleisaun Prezidensiál períodu 2022-2027.
Hafoin rejista, ba jornalista sira Porta voz ekipa susesu kandidatu, Antero Bendito da Silva, Fernandes Ximene hatete, agradese ba apoiantes sira hotu ho sira nia apoiu, ohin sira rejistu ona sira nia kandidatura iha supremu Tribunal de Recurso no hein de’it desizaun final.
“Aproveita momentu ida ne’e hakarak hato’o ba kamarada Maubere sira hotu, propoin ho sira nia apoiu tomak, ita lori ita nia kandidatura Antero Bendito da Silva, mai iha supremu Tribunal Justisa ohin loron. Ne’ebé ita hatama ona ita nia dokumentu hotu, tuir rekejitus, lei ne’ebé ke iha. Ohin loron ita entrega hotu ona, kompletu, desizaun tomak hein tribunal mak deside,” hatete Porta voz Fernandes, iha Tribunal de Recurso Caicoli, 03/02.
Nia hatete, “ita hatama proponentes 6 mil ital,” nia akresenta katak, sira mai ho sira nia forsa rasik no la tane liman ka husu bensaun hosi ema seluk, maibé propoin rasik hosi grupu movimentu sosial.
“Ita fiar ba ita nia forsa Maubere rasik, traballador sira, to’os na’in, estudante, juventude. Durante rekolla ida ne’e, kuaze juventude, estudante ho to’os na’in de’it, i traballador sira. Ita fiar ita nia forsa Maubere para depois lori ita nia luta ne’e ba oin, para konkretiza ami nia objetivu. Ami nia objetivu mak estadu foun, otas foun. Ita hakarak modelu foun, polítika foun, para depois lori mai sosiedade Timor“, dehan Fernando Ximenes
Nia hatutan, sira nia hakarak promove polítika ida popular liu, hodi ses hosi empase polítika ne’ebé ohin loron mosu. Konabá kampaña nia hatete, “ita iha estratejia de kampaña rasik, iha tempu badak ami sei anúnsia ba públiku. Ita nia forma ne’e úniku la hanesan ho sira seluk, maibé ita sei fo sai iha tempu badak.”
Konabá kompetisaun ne’e rasik sira iha optimista katak tinan ida ne’e, tinan esperansa, tanba ne’e mak esperansa sei hela ho juventude, traballador no to’os na’in sira hotu. “Ita fiar masa Maubere, traballador, to’os na’in sira mak sei lori esperansa loloos, i ami fiar iha Marsu agora, sei esforsu maksimu para depois bele lori vítoria ba ami nia kandidatura” nia hakotu.
