Reportajen Adroaldo ‘Saretukau’
Iha loron 3 Fevereiru 2022, ekipa susesu hosi kandidatura independente ba Prezidente Repúblika (PR), eis Padre Martinho Germano Gusmão rejista ona iha Tribunal de Recurso (TR) Caicoli, ho apoiantes naun partidaria inklui partidaria, Partidu Unidade Dezenvolvimentu Demokrátiku (PUDD), hamutuk proponentes 10.000 resin, hodi kompete iha eleisaun Prezidensiál períodu 2022-2027.
Hafoin rejistu, reprezentante, hanesan mos advogada privada kandidatura Independente, Martinho Gusmão, Olinda Fernandes Barreto hatete ofisial rejistu ona, nune’e hein de’it prosesu tuir mai hosi Tribunal de Recurso.
“Prosesu rejistradu, ami ohin konfirmadu ona, rejistradu hosi Tribunal de Recurso ba ami nia kandidatura, Dr. Martinho Germano Gusmão nia kandidatura ba períodu 2022 a 2027. Lista proponente ami nian pur volta de 10.000 mil, hosi 13 munisípiu,” hatete Porta voz Olinda ba jornalista sira.
Advogada privada ne’e hatete sira iha forsa seluk ne’ebé apoiu sira nia kandidatu independente Martinho Gusmão, “ita hotu hatene, antes ami nia kandidata deklara, iha forsa polítika ne’ebé apoiu ami partidu PUDD,” hatete nia.
Nia hatutan, sira iha esperansa ba eleisaun ida ne’e katak sei manan no hatete “ami nia esperansa ne’e manan. Ita hotu-hotu mai hakarak kandidata aan, kompete iha eleisaun, festa demokrasia iha 19 de Marsu, ita iha esperansa boot manan.”
Konabá kampaña, sira seidauk fiksa fatin maibé hafoin tuur hamutuk hodi deside no sei hatama ba CNE no STAE ba planu kampaña eleitoral ne’e.
