Reportajen Santina Lucia da Costa
Sekretáriu Jerál partidu Frente Revolusionáriu Timor-Leste no Independente (FRETILIN), iha vontade hakarak konvida Jerasaun 74-75 atu halibur malu, hodi hateke matan ba matan, halo balansu ba Timor-Leste nia restaurasaun independénsia hodi hateke ba oin.
Iha konferénsia imprensa, Sekretáriu Jerál Partidu FRETILIN, Dr. Marí Bin Amude Alkatiri hateten mai ho preokupasaun boot ida, preokupasaun maka atu kontribui ba eleisaun agora atu akontese ne’e, atu konsolida paz estabilidade, liuliu atu konsolidade estadu de direitu demokratika.
“Hau hanoin tempu ona para ami jerasaun 74-75 la’os jerasaun tuan, hau hatete kedas jerasaun 74-75 ami la’os tuan, atu buka halibur malu para atu halo balansu ba Timor-Leste Restaurasaun Independensia, balansu ne’e importante tebes para ita bele hatene momoos sé mak halo saida, sé mak la halo buat ida, maibé koalia barak, ne’e hau dehan Prezidente Repúblika re-kandidata, eis-Prezidente Repúblika, Nobel da Paz re-kandidata, só falta de’it ami na’in rua Xanana Gusmão para hahú prosesu ida ne’e balansu.” Hateten, Sekretáriu Jerál FRETILIN, Dr. Marí Alkatiri, iha sede Komité Sentrál FRETILIN (CCF), 27/1.
Marí Alkatiri dehan hahú konvoka, konvida sira seluk para ita bele iha korajen hateke matan ba matan halo balansu ba Timor-Leste Restaurasaun Independénsia to’o agora.
“Hau lakohi fó apelu ba publiku mais hau sei hakerek ba lideransa 74-75, para ita bele haree kontinua hanoin ba kotuk, maibé hotu-hotu bele hamutuk hateke ba oin, tanba ita hanoin ba kotuk nostalgia, ne’e impede ita atu hateke ba oin, atu hateke ba oin mak importante, tanba tinan lima tan hakarak ka lakohi tenki iha kapasidade lideransa 74-75 atu impoin dinamika tranjisaun.” deklara, Marí Alkatiri.
Marí akresenta klaru inklui mós Xanana Gusmão, dehan hakarak halo balansu ba Pos-Restaurasaun la inklui Xanana ne’e ita halo balansu saida, tenki inklui, hau nunka nega Xanana ninia funsaun, hau ho Xanana iha diferensa pontu de vista, hau la gosta sona ema husi kotuk, saida mak hau hakarak koalia, koalia iha oin.
“Dinamiku Tranjisaun ne’e la’os narnaran de’it, hau kuandu dehan tranjisaun, tranjisaun para um melhor, la’os tranjisaun para mais jovens lae, atu konsulidade paz estabilidade no hateke ba oin.” Tenik Marí.
Biar nune’e Marí Alkatiri hateten, prontu atu empat mata, sepuluh mata hateke ba malu ba ita, atu haree balansu ne’e, sé mak halo saida, sé mak hetan forsa bainhira kria krize no sé maka husi 2006 to’o agora sempre buka hado’ok krize, ne’e mak dehan mai ita halo balansu.
