Reportajen Silvino Freitas
VIII Governo Konstitusionál liu husi Ministériu Planu Ordenamentu(MPO) halo reuniaun hodi konsulta ho sosiedade sivíl kona ba prosesu reajustamentu, Planu Estratéjiku Dezenvolvimentu (PED 2011-2030), hodi dezenvolve planu Ordenamentu territorial urbana no nasionál.
Tuir Ministru Planu Ordenamentu(MPO), Jose Reis hateten governo halo reajustamentu ba Planu Estratéjiku Dezenvolvimentu (PED), hahú ho rezolusaun ida ne’ebé aprova iha Konsellu Ministru iha 2021 rezolusaun numeiu 81/2021 hodi kria komisaun inter-ministeriál ne’ebé lidera husi Primeiru Ministru no membru sira mak hanesan Vise Primeiru Ministru no Ministru Planu Ordenamentu, Vice Primeira Ministra no Ministra Solidariedade Sosial no Inkluzaun, Ministru Koordenador Asuntu Ekonomiku, Ministru Administrasaun Estatal, no Ministru Prezidensia Konsellu Ministru no Ministra Negosiu Estranjeiru
“Tanba ne’e mak Ministru Planu Ordenamentu(MPO) harii susede ba iha Ministru Planu Investimentu Estratéjiku(MPIE), kompeténsia ne’ebé MPO iha mak atu prodúz mós instrumentu importante rua mak planu nasionál Ordenamentu territóriu, no planu munisípiu Ordenamentu territóriu no urbana” dehan Jose Reis iha salaun Tower Fatu-hada,(25/02).
Tuir nia atu iha planu estratéjiku ida ba oin, presiza hatene loloos potensialidade karakterístika iha ita nia territóriu, karik ita hakarak harii dezenvolvimentu ida ne’ebé ekilibradu mak tenki iha koñesimentu potensiál ne’ebé iha territóriu nasionál tomak iha rejiaun ida ne’e ho rejiaun seluk atu nunee ita justifika loloos.
“Durante tinan 20 auzénsia uitoan iha prosesu dezenvolvimentu territoriál, tanba iha primeiru governu harii duni Sekretáriu Estadu Ordenamentu territóriu, hodi hahú planu urbanu ida iha Dili no ida ba Baucau, maibe depois susede governu Ordenamentu ladún ona importante mai oin” nia dehan.
Nia konklui katak iha 2014 mak hahú diskute hikas lei baze Ordenamentu teritorio, hodi hahu halo levantamentu ba planu urbana iha Dili, maibe seidauk finaliza no governu mak halo fali nia kontinuidade ba iha planu nasional ordenamentu teritorio no planu urbana Dili, ho mos levantamento ba planu urbana iha munisípiu 5 mak Bobonaro, Ermera, Baucau, Lautem no Viqueque enkuantu Atauro no RAEOA halo tiha ona liu husi Zona Ekonomia Eskluzivu Merkadu Sosial (ZEEMS).
