Reportajen Zevonia Vieira
Iha loron 25 Fevereiru 2022, Organizasaun Mundiál Saúde (OMS) entrega ona rapid antigen test kits ba Timor-Leste, ne’ebé hetan apoiu husi Korea International Cooperation Agency (KOICA).
Liuhusi komunikadu imprensa Neon Metin asesu mak marka prezensa iha serimónia entrega ne’e maka Diretora Jerál Prestasaun Serbisu, Dr. Odete da Silva Viegas, Embaixadór Repúblika Korea ba Timor-Leste, Kim Jeong Ho, Diretora KOICA, Eunju Cha no Asesór Politika Saúde OMS, Dr.Vinay Bothra hodi entregra doasaun COVID-19 RDT kits 50,000. Asisténsia ida ne’e sei ajuda haforsa kapasidade teste COVID-19 iha Timor-Leste hodi responde ba dezafiu iha pandemia COVID-19.
To’o loron Fevereiru 24, númeru total kazu COVID-19 iha Timor-Leste to’o ona 22,528, husi total halo teste ba COVID-19 hamutuk 247,440. Kazu lor-loron kontinua aumenta iha fulan Fevereiru nia laran ne’ebé relata kazu 100 kada loron.
“Ami kontente tebes hodi fó apoiu ba Ministériu Saúde ne’ebé serbisu makaas hodi kontinua mantein nasaun seguru iha tempu difisil ida ne’e”, tenik Embaixadór Kim. “Ami mós haree katak Timor-Leste serbisu makas hodi kontrola pandemia ida ne’e. No ami hein katak ho kontribusaun hanesan ohin ne’e bele haforsa no halo lais liu tan progresu ita fila ba moris normal hanesan uluk iha Timor-Leste”. dehan Embaixadór Repúblika Korea ba Timor-Leste, Kim Jeong Ho.
KOICA no OMS fó apoiu ona Ministériu Saúde ho susesu iha implementasaun programa Integradu ba eliminasaun no kontrola moras NTD dezde tinan 2016. LIuhusi esforsu hamutuk hirak ne’e nunee mós ho lideransa ne’ebé forte husi Governu, eliminasaun moras LF, kontrolu STH, no interupsaun transmisaun moras framboezia hanesan problema saúde públiku – Timor-Leste besik ona atinji. Bainhira SARS-CoV-2 ne’e hahú hada’et iha Timor-Leste, OMS serbisu hamtuuk ho KOICA ho lalais re-aloka no mobiliza rekursu ne’ebé iha hodi bele fó apoiu másimu ba Governu Timor-Leste iha luta konta pandemia ida ne’e. Hanesan parte ida husi esforsu hamutuk ida ne’e, KOICA no OMS fó ona doasaun kama médiku 100, no kama 500 ba fasilidade izolamentu no tratamentu. Dala ida tan, OMS no KOICA hamutuk fó apoiu ba Timor-Leste liuhusi apoiu test kit 50,000.
“Lori Ministériu Saúde no povu Timor-Leste nia naran, ha’u hakarak espresa ha’u nia apresiasaun no gratidaun hodi kontinua no konsidera fó apoiu hodi responde ba COVID-19 iha Timor-Leste.” dehan Dr. Odete da Silva Viegas, Diretora Jerál Prestasaun Serbisu Saúde, Ministériu Saúde.
“Kazu surtu Omicron ne’ebé foin lalais aumenta makaas ne’e, fó alerta mai ita dala ida tan atu serbisu makaas hodi kombate virus ida ne’e. Teste RDT 50,000 ne’e ajuda hodi halo identifikasaun ba kazu no izolamentu kazu COVID-19 liuhusi hasa’e kapasidade ba teste COVID-19 no bele mós utiliza hanesan instrumentu prinsipál hodi halo detekta kazu iha área rural, no area remotas’, dehan Reprezentante OMS, Dr Arvind Mathur.
