Reportajen Juvinal Cabral
Asisténsia ne’e fornese liuhosi Japaun nia eskema asistensia Dezenvolvimentu “Subvensaun Asistensia ba Projetu Seguransa Umanu iha Baze (GGP).”Kontratu ne’e asina entre Embaixadór Japaun ba Timor-Leste, no representante hosi ONG lokál, Juventude Inovativo (JI), nu’udár implementadór ba projetu ne’e.
Juventude Inovativo sei konstrui edifisiu eskola EBF Lour iha suku Lour, munisipiu Bobonaro ho montante finansiamentu USD 143,000 hosi Governu Japaun.
Embaixador Kimura hateten “Edukasaun hanesan prioridade ida iha dezenvolvimentu Timor-Leste nian, no Japaun mós rekuñese importánsia iha fornesementu edukasaun ho kualidade ba ema hotu, inklui iha área rurál sira.
“Ha’u hein katak ba parte hotu ne’ebé envolve iha konstrusaun ne’e sei hala’o nafatin servisu di’ak hodi kompleta projetu ne’e ho susesu. Ha’u hein tebes atu haree fali imi hotu no komunidade sira hosi fatin projetu nian iha serimónia inaugurasaun hodi selebra finalizasaun projetu ida ne’e”.
Governu Japaun implementa ona ho ativu projetu lubuk ida iha Timor-Leste, hahú hosi dezenvolvimentu infraestrutura ho eskala boot to’o projetu ho eskala ki’ik ne’ebé fó benefísiu diretamente ba komunidade lokál sira,” dehan embaixador Japaun Tetsuya Kimura iha serimonia asinatura kontratu GGP entre embaixada Japaun ho NGO Juventude Inovativu (JI), embaixada Japaun 18/03.
Iha fatin hanesan reprezenta ministra edukasaun, diretor jeral Apolinario Serpa Rosa hato’o nia agradesemntu ba apoiu husi governu japaun liuhosi Ministériu Edukasaun simu ajuda barak hosi Japaun, liuliu projetu infraestrutura sira hosi sira-nia programa JICA.
“Maibé ami mós simu apoiu hosi NGO japonês barak ne’ebé hanoin ita-nia estudante sira iha-ne’e, hodi kria livru ba ita, prepara biblioteka ba ita, no fó apoiu
seluk tan ne’ebé ita presiza. Ohin loron ita haree exemplu ida tan hosi Japaun nia
ajuda ba Timor-Leste, liuhosi programa Grassroots Grant Program, “ dehan diretor jeral ministeiru edukasaun iha nia diskursu, embaixada japaun 18/03.
Tanba Governu Japaun rekoñese katak nasaun ida labele dezenvolve hosi ninia Governu de’it, maibé presiza kontribuisaun hosi ema hotu iha nivel organizasaun, komunidade no individuu. Nune’e mos prezidente autoridade munisipiu Bobonaro, Alexandre Pires lori komunidade nia parte agradese ba governu japaun nia apoiu tomak ho fuan ba povu munisipiu Bobonaro.
“Ita ko’alia sobre dezenvolvimentu ita labele koalia individual egois ne’e susar lao ba oin, ha’u agradese nafatin ba embaixador japaun. Ohin embaixador ko’alia ha’u mataben atu monu ha’u la espera senhor embaixador japaun fo ho fuan ba povu munisipiu Bobonaro, ha’u lori povu rihun atus resin agradese ba governu Japaun”, dehan PAM Bobonaro iha nia diskursu, embaixada Japaun.
PAM haktuir problema iha munisipiu Bobonaro la’os edukasaun de’it, loos duni fasilidade eskola la sufisiente iha fatin balun eskola bee la iha no balun eskola kondisaun at tebe-tebes, eskola balun di’ak hariis fatin iha bee la iha, iha fatin balun hariis fatin la iha bee estraga de’it situasaun sira ne’e mak estudante sira hasoru, balun lakon sira nia futuru tanba la iha kondisaun dalaruma nia obriga administrador postu sira servisu ho liman de’it la uja osan, la uja kareta ka ekipamentu entaun servisu ne’e todan no problema ida ne’e mak sira hasoru.
