Home Notisia Sai PR, Virgílio Sei Tau Importánsia Liu Ba Problema Sosiál Ne’ebé Komunidade...

Sai PR, Virgílio Sei Tau Importánsia Liu Ba Problema Sosiál Ne’ebé Komunidade Preokupa

313
0
Virgilio visita merkadu iha Passabe.[Foto: Ekipa susesu Lamukan | 05.03.2022]

Reportajen Adroaldo ‘Saretukau’

Lia tatoli kandidatu Prezidente Repúblika, Vigílio da Silva Guterres “Lamukan” ho númeru sorteitu 12,  ba eleitor sira iha RAEOA, durante loron rua hala’o kampaña ho tipu diálogu no door to door hamutuk ho komunidade Oe-cusse ka Atoni oan sira, hodi haree besik mos problema sosial sira mak sira hasoru, liu-liu estrada, klínika, eskola no dezenvolvimentu sira seluk, no husik hela nia mensajen katak wainhira sai Prezidente Repúblika, nia sei tau importánsia liu ba problema sosiál mak komunidade hasoru.

Kandidatu ho númeru sorteiu 12 nia lia tatoli aberta iha nia konta sosiál Facebook, nia hakerek atividade no viajen sira mak nia ho ekipa susesu halo durante kampaña hamutuk iha komunidade nia leet. Sira liu hosi Leuflua, Suku Taiboko, Sub-rejiaun Pante Makassar. Loron 1 marsu kalan, nia ho ekipa horik hamutuk ho populasaun aldeia Oe Bebu, Suku Lela Ufe, Sub-rejiaun Nítibe. Hahu kalan (1/3), kulturalmente nia membru família Oe-Bebu, Lela Ufe nian.

Nia hatete iha Taiboko, ba populasaun sira ne’ebé marka prezensa iha ha’u nia kampaña, ha’u dehan Oe-cusse nu’udar rai ki’ik, ne’ebé iha rai nasaun viziñu nia leet, tenki sai lalenok Timor-Leste nian. Sakato, Citrana, Naktuka, Nítibe, Oesilo, Pásabe, tenki refleta la’os de’it Timor-Leste nia furak, maibé leno Timor-Leste nia orgullu no onra.

Ba kampaña loron datoluk nian, ekipa kandidatu Lamukan to’o iha Pune, Oesilo no hakat to’o mos Pásabe. Nia hatete hanesan ba Lela Ufe, Nítibe, kondisaun estrada aat tebes. Iha Lela Ufe, rai halai taka luron, kareta liu ladi’ak. Atu ba Pune, tenki bobar husi Oesilo, tanba luron kotu.

“Ko’alia ho komunidade sira iha kampaña door to door, populasaun nia preokupasaun hanesan, luron aat, sentru saúde la iha, no balun dook husi sira nia aldeia ka suku. Iha Pásabe sei iha edifísiu eskola ne’ebé didin ho au,” sita kandidatu ho númeru sorteiu 12 ne’e iha nia konta Facebook.

“Kondisaun iha fatin sira ne’e sai nu’udar evidénsia forte ba ha’u nia afirmasaun polítika katak tinan 20 ona ita restaura independénsia, maibé roman independénsia ne’e seidauk leno kona ita nia povu. Tinan 20 ukun na’in sira uza povu nia konfiansa polítika ne’ebé hetan hosi eleisaun atu serbi de’it sira nia interese polítiku. La’os atu serbi povu,” kandidatu Vigílio preokupa, 04/03.

Lamukan hatete, hafoin viajen no to’o fatin destinasaun, Colele-Sa’e, Cruz, nia komunika kedas ba Prezidente Autoridade, RAEOA, Arsênio Bano, nu’udar mos nia kompañeru da luta hodi transmiti preokupasaun populasaun nian, ne’ebé nia haree rasik ho matan, momentu hanesan Arsénio rekoñese ezisténsia preokupasaun sira ne’e. Ba Arsênio Bano kandidatu Vigílio dehan, “nasionalista sira nia pekadu imperdoavel (dosa tak terampuni) mak halo nia povu rasik sente moe iha povu seluk nia oin.

“Bainhira ha’u sai Prezidente Repúblika, ha’u sei la promulga Orsamentu Jeral Estadu (OJE) bainhira RAEOA nian la inklui alokasaun atu hadi’a estrada, harii sentru saúde no eskola sira iha área rurais,” hatete kandidatu Lamukan.

Ikus kandidatu indepedente ne’e hato’o nia mesajen ba Atoni oan sira katak la iha biban atu ba to’o Sub-rejiaun seluk RAEOA nian atu fahe informasaun konabá ni-nia kandidatura ba PR, maibé nia fiar katak ho nia prezensa iha nia vizita durante loron 3 nia laran, reprezenta komunidade hotu nia preokupasaun.

“Loron 19 Marsu, loron importante ba imi atu hili imi nia Prezidente Repúblika foun. Imi hatene ona se mak prezidente foun ne’e. Nia la’os foun de’it, maibé tenki jerasaun foun. La’os de’it tenki jerasaun foun, maibé mos tenki aten-barani. Barani atu halo mudansa, barani halo Timor-Leste ida Fraternu liu. Vota ba ema ne’ebé sei hamriik ho imi atu defende imi nia direitu. Vota ba prezidente ne’ebé sei la husik imi sai mutun/vítima ba dezenvolvimentu,” mensajen kandidatu Lamukan ba povu Atoni oan sira.

Nu’udar Prezidente Repúblika ha’u enkoraja Autoridade RAEOA atu promove dezenvolvimentu ida armoniozu no integradu, dezenvolvimentu ne’ebé respeita populasaun sira nia direitu ba rai no uma, Virgílio Guterres hakotu.

Hafoin kampaña eleitorál loron rua iha rai ketan Oe-cusse, kandidatu Lamukan ho ekipa sei kontinua kampaña iha munisípiu Baucau, Postu Venilale, iha loron hanesan sei hakat liu ba Postu Ossu, munisípiu Viqueque, Sábadu fin de semana ne’e, (05/03).

Print Friendly, PDF & Email

LEAVE A REPLY

Please enter your comment!
Please enter your name here