Reportajen David da Costa Gusmao
Kandidatu Prezidente da Republika (PR) Virgilio da Silva Guterres “Lamukan”, nia kampaña dialogu ba dala-11 iha suku uma kaduak-Ilmanu (Weua-Marmer) postu Lakloo, munisipiu Manatuto.
Iha dialogu ne’e komunidade Ilimanu, Zacarias dos Santos hateten atu labele sai vitima beibeik ba poder politiku no dezenvolvimentu , mai vota ba kandidatu Prezidente Republika Virgílio da Silva Guterres númeru sorteiu 12.
“Ita labele sai vitima beibeik ba poder politiku, no dezenvolvimentu ne’ebe akontese ona ba ami Manuleu. Diak liu mak ne’e, ita ba vota ba numeru 12. Tanba numeru 12 ne’e, numeru ida ne’ebé uniku duni,” dehan Zacarias dos Santos, bainhira halo kampaíña dialogu ho kandidatu PR “Lamukan” iha Suku uma kaduak-Ilimanu, Domingu 13/03.
Nia dehan karik povu fó fiar duni, atu sai duni mata dalan ba povu no nasaun Timor-Leste nian. Liuliu povu ne’ebe mak iha kraik, hit an netik mai no vizita netik povu kiik sira hanesan agora daudauk mai konsentra iha fatin ida hanesan ne’e.
“Maibe Karik povu mak la fó fiar ba ita boot, no la tuir iha Prezidente mós, tau matan netik ba ami,” tenik nia.
Nune nia rekomenda ba kandidatura Prezidente da Republika Virgílio Guterres karik povu maioria maka fó apoiu hodi ba tuur iha Palásiu Aitrak laran keta haluha povu kiik sira.
“Ami povu kiik, ne’ebé maka durante ne’e sente triste hela iha nakukun laran no ameasa nia laran, keta halua ami, Karik ami hakat ba dere odamatan loke netik odamatan ba ami,” haktuir nia.
Kandidatu Prezidente Repúblika, Virgílio da Silva Guterres “Lamukan”, dehan kualkér dezenvolvimentu projeitu ne’ebé halo, atu harii projetu ruma labele halo povu no komunidade sai vitima ba dezenvolvimentu. Se iha nesesidade duni, tanba planu atu harii duni iha fatin ruma populasaun iha ba, labele lori militár no veteranu ba ameasa, maibe koalia ho povu atu nune’e bele hetan solusaun.
Nune’e hanesan Prezidente Republika odamatan nakloke ba povu se deit mak hakarak atu hasoru, tanba iha protokolu hodi halo apontamentu, tenke hatama pedidu, atu nune’e bele halo kalendaliria katak loron hanesan ne’e povu atu hasoru, ba ida ne’e odamatan PR nakloke.
“Atu sai Prezidente ka la sai Prezidente hau maka ne’e, no koalia nafatin hanesan hau koalia, kritika nafatin hanesan hau kritika ukun nain. Prezidente tenke hakuak ema hotu, hau fiar no haksolok tanba aldeia Ilimanu prontu atu fo apoiu ba hau. Sai prezidente ka la sai Prezidente iha loron 19 mak ita hatene. Labele haluha salva imi nia votus ba ema ne’ebe imi hatene no imi fiar, no Balun mai fo osan imi simu deit, maibe fó imi nia votus ba numeru 12, tanba vota ba numeru 12 vota ba unidade no faternidade,” nia fo hanoin
