Reportajen Adroaldo ‘Saretukau’
Oxfam Timor-Leste servisu ho Alumni Parlamentu Foinsa’e Timor-Leste (APFTL) hamutuk ho Rede Koligasaun Agrikultura organiza dialogu ho kandidatu Prezidente Republika periodu 2022-2027, ho tema Hateten Mai Ita nia Mehi ba Povu”.
Liuhusi dialogu ne’e hodi hato’o aspirasaun ba kandidatu Prezidente Republika sira, no rona kandidatu sir nia hanoin relasiona ho diversifikasaun ekonomia liuhusi investimentu setór agrikultura no produtivu sira seluk
Iha abertura ba diálogu ne’e, Strategy and Engagement Lead Oxfam Timor-Leste Adilson da Costa Junior agradese ba Rede Koligasaun Agrikultura ne’ebé disponibiliza ona sira nia tempu, hodi partisipa iha diálogu interasaun ho kandidatu Prezidente Republika sira.
“Oxfam nafatin oferese espasu hanesan atu iha diálogu ne’ebé nakloke, hodi rona saída mak ita nia kandidatura sira ni-nia hanoin konabá Timor-Leste nia dezenvolvimentu, liu-liu iha setór agrikultura, diversifikasaun ekonomia no mos setór produtivu seluk,”
Adilson espera ho diálogu ho ida ne’e, kandidatu sira bele hato’o sira nia programa sira, relasiona ho dezenvolvimentu Timor-Leste nia área produtivu, hodi rona mos grupu produtivu sira nia hanoin hodi iha hadi’a no sustentável liu tan.
Iha fatin hanesan Prezidente APFTL, Zaulino Gomes da Silva hatete APFTL hamutuk ho Oxfam no grupu Koligasaun Agrikultura hanesan grupu ki’ik ida ne’ebé servisu ho voluntáriu, hodi halo advokasia ba governu no órgaun soberanu sira oinsá haree setór produtivu sira, liu-liu agrikultura hanesan setór ida ne’ebé importante hodi kontribui ba ekonomia rai laran.
“Tanba ida ne’e ita konvida kandidatura sira ne’ebé kandidata aan, kompete iha eleisaun prezidensiál ni-nian, atu hatete sira nia perspetiva liga ba setór produtivu, liu-liu setór agrikultura, turizmu sira, oinsá diversifika setór sira ne’e kontribui ba ekonomia rai laran. Tanba ida ne’e ita konvida grupu agrikultura hosi munisípiu sira mai direita iha ne’e, atu rona perspetiva kandidatura sira nian, oinsá kandidatura sira eleitu sai Prezidente atu ko’alia ho governu atu haree setór ida ne’e, nu’udar setór ne’ebé importante mos, oinsá estimula joven sira liu-liu foinsa’e sira estímulu sira nia kriatividade, atu kontribui ba setór ida ita temi, hanesan setór produtivu,” hatete Prezidente APFTL Zaulino.
Nia hatutan ita nia governu hetan finansia barak liu hosi fundu petrolíferu kuaze 90% kompara ho reseita doméstika sira, tanba ida ne’e mak oinsá atu haree hamutuk liu-liu papel órgaun soberanu sira. Zaulino fo obrigadu ba grupu joven sira ne’ebé organiza aan ho voluntáriu, hodi mai hamutuk rona direita kandidatu PR nia perspetiva liga ho seitor produtivu.
Iha parte sorin partisipa iha diálogu ne’e, Delfina Exposto hosi grupu TILOFE munisípiu Ermera, ne’ebé produz rai metan orgániku, hatete ba diálogu ida nia husu atu preokupasaun no saída mak ohin grupu produtivu sira hato’o no husu, kandidatu sira bele tau importánsia no alista iha sira nia ajenda, karik sai prezidente bele servisu hamutuk ho governu bele rezolve sira nia problema hirak ne’e, hodi motiva nafatin sira atu kontinua sira nia atividade.
“Ha’u nia mensajen, ba sira eleitu ona ami nia prioridade sira nafatin fo apoiu ba ami grupu produtivu nomos ba fali ami nia kolega ne’ebé seidauk hetan atu nune’e bele motiva fali joven sira seluk kria grupu hanesan ami, sira kria rasik kampu servisu ba sira nia aan rasik,” Delfina nia esperansa ba kandidatu PR foun.
Partisipa iha diálogu ne’e mak kandidatu Prezidente Repúblika Virgílio Guterres, Constâncio Pinto, Angela Freitas no Felisberto Duarte. Entretantu kandidatu seluk la partisipa tanba hala’o hela atividade kampaña eleitoral iha munisípiu.
Grupu 12 ne’ebé partisipa diálogu ne’e mak grupu CORNER Baguia, prezerva ai-han lokal, HATAJO Aileu, produs modo, HABURAS Maubise, produs modo, Juventude Haklaken Ainaro, EAMK Ermera, produs ai-kulat mutin, IDOT Ermera, produs buah naga, TILOFE Ermera, produs rai metan super orgánika, Roman Foinsa’e, YEFF Díli, produs baria, JORAA Díli, produs ai-funan, FJDE Ermera, produs kafe, no UNAER Ermera, produs viveirus no to’os integradu.
