Reportajen Zevonia Vieira
Partidu Frente Revolucionaria de Timor-Leste Independente (FRETILIN), Partidu Libertasaun Popular (PLP)no partidu Kmanek Haburas Unidade Nasional Timor Oan (KHUNTO) asina ona plataforma tolu hodi haburas liután ba programa sira ne’ebe VIII governu hala’o ona no oinsá hametin liu ba iha eleisaun parlamentár 2023.
Iha loron serimónia asinatura kompromisu pre-eletoral plataforma partidu tolu nian, Prezidente PLP, Taur Matan Ruak deklara katak Partidu tolu ne’ebe kontinua hamutuk sei konsentra ba asuntu importante sira mak jere impaktu krize nian, nune’e labele fo terus makaas ba povu, luta makaas ba kreximentu ba rekuperasaun ekonomia, fundamental reforma finansas públiku hodi hasae transparénsia responsabilizasaun no hare ba ekonomia rejionál no internasionál.
“Ita hamutuk forte liu, ketak-ketak la seguru tanba ne’e momentu ida ne’e sai nu’udar istóriku ba ita nia nasaun, laos ba partidu tolu deit maibé ba ita nia nasaun, solusaun mak hamutuk hodi hadia”, dehan Taur iha salaun Tower Fatuhada, 15/04.
Nia realsa tan katak iha plataforma ne’ebe presiza tau importánsia mak presiza iha dezenvolvimentu territoriál entegradu, inkluzivu no sustentável. Nia dehan se hare ba kotuk zona rural sira abandonadu, nune kanaliza rekursu barak liu ba zona rural sira, para hare populasaun sira hamnasa, no foka ba programa.
Nia mos fo hanoin ba nia membru governu sira ne’ebe mai husi partidu tolu ne’e katak tenke implementa planeamentu sentralizadu, Ministru ida labele deside polítika ida ba nia an rasik. Nune’e nia dehan rekursu finanseiru ba nesesidade kada tina kontinua sae, nune’e presiza tau atensaun ba diversifikasaun ekonomia, integrasaun Timor nia ekonomia iha rejiaun no nivel internasionál.
Nia konklui katak plataforma ne’ebe asina ona, bainhira atu hahú kampaña iha idak-idak nia partidu, se la ignora partidu seluk, “kuandu ko’alia susesu husi VIII Governu, tenke ko’alia partidu 3 laos ida deit. Ba eleisaun ita laiha programa eleitorál interpartidaria, ita iha mak programa eleitorál partidária”.
