Home Analisa Sidade Universitaria Aileu Labele Hamate Agrikultura Komunitaria

Sidade Universitaria Aileu Labele Hamate Agrikultura Komunitaria

785
0
Jemicarte Moniz dos Reis. Lic.AP. [Foto: Dokumentu privadu | 12.12.2020]

Hakerek nain Jemicarte Moniz dos Reis Lic. AP nudar membru Rede ba Rai

Asesu no direitu ba rai importante liu atu asegura direitu baziku ba sidadaun hotu-hotu. Koalia koná-ba rai no nai’n ba rai ne’e laos buat foun iha Timor Leste. Hori uluk kedas iha tempu beiala sira nian, iha ona kuñesementu ba konseitu rai no nai’n ba rai. Maske laiha konseitu eskrita ruma ne’ebé koalia koná-ba rai no nai’n ba rai maibé ezisti ona termu balun iha lian lokal rasik ne’ebé refleta ona konseitu koná-ba rai no nai’n ba rai. Tuir ema timor oan nia interpretasaun ba pratika ne’ebe iha define katak rai mak ita nia knua no uma hela fatin, ita nia moris fatin, ita nia lulik sira nia horik fatin, beiala sira nia horik fatin, ita nia to’os no ita nia natar no seluk-seluk tan. Tanba ne’e konseitu nai’n ba rai tuir kultura Timor leste iha nia kultura rasik ne’ebé nudar valor uniku hodi regula relasaun entre ema ho ema, ema ho natureza no ema ho matebian ou beiala sira.

Sistema tradisional ida ne’e ezisti hori uluk kedas iha tempu beiala sira nian no kontinua vigora to’o ohin loron. Nune’e mos akontese katak iha rai balun ne’ebe beiala sira konsidera hanesan rai komunidade nian. Nune’e ema hotu bele asesu ba rai komunidade hodi halo atividades hanesan halo uma ka halo to’os komunal nian no seluk seluk tan. Tuir Konstituisaun Republika Demokratika de Timor Leste             (K-RDTL), Artigu 54o hateten katak ema hotu-hotu sidadaun Timor Leste iha direitu ba rai.

Relasiona ho desizaun Governu ne’ebé hili Munisipiu Aileu hodi estabelese  cidade universitaria no okupa propriedade komunidade agrikultura nian, tanba fatin ne’ebé governu hili ne’e potensia tebes ba agrikultura ne’ebé identifikadu nudar rai bokur ne’ebé potensia no ativa hela nudar baze produsaun agrikultura nian, ne’ebé konsidera hanesan dalan ba harii ekonomia real povu nian, liu liu durante ne’e sustenta hela moris familia nian. Maibé Estadu seidauk halo esforsu masimu hodi proteje direitu povu nian. Estadu seidauk hatudu nia papel núdar regúlador valóres universal direitu demokratikus RDTL nian iha timor leste no area remotas seluk hodi hametin povu nia direitu ba rai. Tanba rai mak bele dezenvolve ekonomia hodi kontribui ba nasaun ida ne’e. No lei Nu 13/2017 kolia klaru tebes no esklarese konseitu rua liga ho rai lisan propriedade komunitaria no zona protesaun komunitaria.

Propriedade Komunitaria

“Sai nu’udar propriedade komunitaria lokal nian bein imovel ne’ebé tuir komunidade lokal ida, konsidera katak pretense ba komunidade tomak ne’ebé sira uza hamutuk, ka liu husi grupu individu balun ka familia, no haktuir uzu ba rai kostume  lokal.” (Artigu 27. 10 , Lei 13/2017).

Zona Protesaun Komunitaria

“Zona Protesaun Komunitaria mak area ne’ebé estadu tenke fó protesaun, ho objektivu atu salva interese ne’ebé komum husi komunidade lokal ida liu husi protesaun ba area uma nian, area to’os/natar, ka fatin ne’ebé relasiona ho lisan, fatin hakiak animal, be’e matan ka fatin ne’ebé iha rekursu natural sira ne’ebé uza fahe malu no sai rekursu nesesariu ba komunidade sira nia moris.” ((Artigu 230, Lei 13/2017).

Nune’e mós Lei 8/2017 ne’ebé kolia kona ba espropriasaun tanba utilidade públiku, Artigu 8 ne’ebé prinsipal liu iha klauzula 3 hateten katak, espropriasaun sempre ho karakter exesional no tenki uza deit bainhira la posivel uza bein moveil seluk hodi konkretiza finalidade ka dezenha fali prejetu ne’ebé atu implementa ka fundamenta ba ninia fin. No iha Artigu 42 despezu ne’ebé prinsipal iha klauzula 2 hateten hahalok tenki iha kondisaun ne’ebé garantia dignidade ema nia direitu, no seguransa ba ema ne’ebé afeta, respeita nafatin prinsipiu proporsionalidade ba edukasaun no laos diskriminasaun.

Husu ba Ministeriu Agrikultura atu labele nonok deit tenki foti pozisaun ruma atu bele salva rai ida ne’ebé konsidera hanesan zona produtividade atu nune’e labele hamate agrikultura sira nia produsaun tanba maioria ita bele dehan 85% komunidade moris hanesan agrikultura no mai husi rai, se Ministeriu Agrikultura nia asaun mak tarde sei lori konsekuensia ne’ebé boot ba agrikultura iha future oin mai ita, hare ba realidade povu barak moris ho vida agrikultura no agrikultura mak sai hanesan baze prioridade ne’ebé as tebes hodi haforsa ba setór sira seluk hanesan setór ekonomia, setór edukasaun, setór saude no estabilidade nasaun ne’e nian, liu husi hamosu no hametin sustentabilidade ba nesesidade baziku, liu-liu aihan. Atu hetan Susesu ida ne’e bele haforsa setór ekonomia hanesan hadia gestaun atu jere produsaun agrikultura, hodi hasa’e kresimentu no rendementu uma laran. Ba setór saude mak hasa’e seguransa aihan sei tulun hadiak mós nutrisaun uma kain nian. Setór edukasaun nian mak promove sustentabilidade edukasaun no konservasaun rekursu humanu ida diak. Rai ne’ebé mak sei uza ba kria Sidade Universitaria ho hektares 36 nudar rai produtivu tebes ba seitor agrikultura no maioria komunidade depende tebes ba sira produsaun husi rai ida ne’e atu bele sobrevive aliende ne’e mos rendimentu ne’ebé sira hetan liu husi batar, modo, hare, kafe no seluk-seluk tan ne’ebé sira kuda iha rai produtivu ida ne’e uza hodi sustenta sira nia oan ba eskola no uza mós ba nesesidade lor-loron nian.

Hare bá realidade konseitu dezenvolvimentu atual iha risku no lori ameasa bo’ot bá komunidade kiak no vulneravel sira sei lakon moris subsitensia, lakon kultura no mós rendimentu familiar. Nu’une sei aumenta kiak sai aas liu tan, tanba deit konseitu dezenvolvimentu politika rai ne’ebé produz husi estadu hodi foti povu kiak nia rai produtivu hodi harii mega projetu sira iha ne’ebé fó sira nia importansia bá lukru ekonomia duke bá produsaun aihan iha rai leten hodi sustenta povu nia moris mak sustentavel no ekuitavel.

Opsaun Husi Komunidade sira

Tanba ne’e komunidade sira husu ba governu atu:

  1. Konsidera sira nia direitu nu’udar nain ba rai
  2. Konsidera opsaun ne’ebé komunidade fó hodi hili rai seluk iha Mausadu iha suco Bandudato, Lau-Usi Lahae, ho Luan 66 hektare.
  3. Konsidera hodi tetu opsaun alternative ne’ebé komunidade sira oferese hikas rai Mausadu iha suco Bandudato, Lau-Usi no Lahae, ho luan hektares 66 ne’ebé la iha komunidade ruma maka posse-doura nomos rai Hundolte iha suco Liurai ho Malare, ho luan hectare 26. Ba opsaun hirak ne’ebé oferese, komunidade konsidera propriedade estadu nian, liu-liu rai Mausadu tanba uluk iha tempu portuguez nian espasu ne’e utiliza hodi konstrui eskola ba komunidade sira, nune’e governu liu husi Ministeriu Justisa la konfuzaun bainhira halo despesu administrativa no entidade benefisiariu hanesan Ministeriu Ensinu Superior no Kultura la presiza preve orsamentu hodi halo endiminizasaun ka kompensasaun.

Governu Liu husi Ministeriu Justisa no Entidade Benifisiariu hanesan MInisteriu Ensinu Superior Sensia no Kultura Viola Komunidade sira nia Direitu Primariu sira ne’ebé haktuir iha Lei Espropriasaun tanba Utilidade Publika, aktu hirak ne’e hanesan tuir mai ne’e;

  1. La Konsidera opsaun ne’ebé komunidade fó hodi hili rai seluk iha Mausadu iha suco Bandudato, Lau-Usi Lahae, ho Luan 66 hektare.
  2. Governu admite Kompaña Bernabad no hetan seguransa husi aparellu estadu Polisia Nasional Timor-Leste (PNTL) hodi halo estudu viabilidade ba propriedade komunidade sira nian sem komunika ho komunidade, ne’e konsidera hanesan aktu Ilegal, no hatudu karakter obrigatoriu ka brutalizmu.
  3. Maske komunidade seidauk konkorda ho mekanizmu hirak ba espropriasaun ne’ebé la aplika tuir lei, entidade benifisiaria sira haruka ona maluk balu inkliu obriga komunidade hodi loke ona sira nia konta bankaria.
  4. Governu la halo estudu ba impaktu sosial no realojamentu ba komunidade ne’ebé konsidera nudar afetadu ba projetu ne’e rasik.
  5. Iha mos ona kazu krime ne’ebé involve aparellu estadu nian hanesan Polisia Nasional Timor-Leste (PNTL), maske kazu ne’e taka ona. Husi Situasaun no kondisaun hirak ne’ebé akontese ne’e hanesan pratika injustisa ne’ebé mak lao no sei reforsa liu tan hodi kria hela dezordem, dezigualdade sosial ba jerasaun sira tuir mai.

Negosiasaun Entre Komunidade ho Entidade Benifisiariu Ministeriu Ensinu Superior no Kultura

Prosesu negosiasaun entre parte Entidade benifisiariu Ministeriu Ensinu Superior no Kultura ho komunidade sira halo sorumutu ona, maibé seidauk rezulta akordu intendimentu mútuo ruma. Durante prosesu negosiasaun komunidade iha vontade kolabora diak tebes ho parte Entidade benifisiariu Ministeriu Ensinu Superior no Kultura, no komunidade sempre hato’o preukupasaun sira kona-ba sira nia direitu lolos maibé parte Entidade benifisiariu Ministeriu Ensinu Superior no Kultura, la fó resposta serteza bá komunidade sira.

Implementasaun ba Estadu nia Obrigasaun sira

Estadu sira tenke garante katak despezu so bele hala’o iha sirkunstansia exasional. Despezu ejijejustifikasaun tomak tanba impaktu adverse ba direitus umanus bar-barak ne’ebé rekoñese internasionalmente. Kualker despezu tenke:

  1. Halo tuir haruka;
  2. Hala’o tuir lei internasional direitus umanus nian;
  3. Hala’o ba deit finalidade hodi promove moris diak jeral;
  4. Razoavel no Proporsional;
  5. Regula hodi garante kompensasaun tomak no justu no reabilitasaun;
  6. Halo tuir mata dalan ida ne’e. Protesaun ne’ebé fornese hosi rekezitu prosesual hirak ne’e aplika ba ema vulneravel no grupu afetadu hotu-hotu, la haree ba karik sira kaer titulu ba uma no propriedade tuir lejislasaun nasional nian.

Respeita Direitus Umanus

Respeita Direitus Umanus  iha kontestu nasaun Timor-Leste ukun rasik a’an (Independensia) sai nafatin nudar preukupasaun husi entidade sira iha rai laran nomos komunidade internasional sira, iha prosesu konstrusaun nasaun Timor-Leste hodi dezenvolve instituisaun estadu hamutuk ho ninian enkuadramentu legal sira ne’ebé respeita prinsipiu demokrasia no valor sira direitus umanus nian. Tuir prinsipiu direitus umanus nomos enkuadramentu legal nian indika katak estadu mak iha kompotensia atu garante, respeita, protégé no hakonu direitus fundamental sidadaun sira nian, mak bainhira entidades la halo sira nia obrigasaun tuir lei konsidera nudar violasaun kontra direitus umanus povu nian, iha aspeitu direitu sivil politika nomos direitu ekonomia, sosial no kultura.

Direitun Asesu ba Rai no Uma

Husu ba governu kria programa nasional ida kona ba uma adekuadu husi propriu instituisaun nasional ida ne’ebé iha kompotensia atu dezenvolve uma adekuadu no halo kontrolu ne’ebé efetivu, inkliu kria fundus ne’ebé apropriadu hodi hari konstrusaun foun ba residensia komunidade ka populasaun kbit laek sir abele asesu. Prevene eviksaun ne’ebé uza forsa no kria lei hodi regula kona ba prosedimentu propriu ba eviksaun, kompensasaun no realokasaun ne’ebé prevene violasaun direitus umanus labele akontese antes, durante no depois eviksaun. Haforsa servisu entre liña ministerial sira ne’ebé relevante atu asegura intervensaun integradu ba planu eviksaun tuir lei no padraun estandar internasonal, hodi garante asesu ba informasaun relasiona ho prosesu tomak ba planu eviksaun nian.

Direitu Asesu ba Aihan

Haforsa programa Agrikultura nia objektivu atu garante seguransa  produsaun ba populasaun. Kontrolu  sistema distribuisaun produsaun atu garante asesu ne’ebé hanesan no mós haforsa produsaun variadade produtu lokal ne’ebé adekuadu atu alkansa sustentabilidade produsaun ba povu hotu. Kontinua halo estudu ka peskiza kona ba introdusaun ba teknologia foun  ba agrikultura no aumenta treinamentu hodi hasai kuiñesimentu kona ba produsaun iha ita nia rai. Hamosu Politika no Programa dezenvolvimentu ekuitavel no inklusivu ne’ebé aumenta kresimentu ekonomia hodi fo benifisia ba ema kiak no vulneravel sira iha area rural, medida hirak hanesan sei redus dependensia ba rekursu natural limitadu sira. Iha Programa hametin kresimentu sustentavel mos implika ba ambiente no biodiversidade no medidas sira atu prezerva sustentabilidade rekursu natural sira no konsideira iha prosesu dezenvolvimentu sira. Governu presiza Diversifika no Moderniza iha Setór agrikultura hodi hasa’e produtividade ekonomia iha Rai laran.

Triste tebes katak iha tinan Sanulu resin ona ukun rasik an nia laran ne’e Dirasaun Nacional Terras Propriedades e Serbisus Cadástrais DNTPSC la kónsege leno an hanesan Instituisaun Estadu nian ne’ebe tau matan ba administrasaun rai ba komunidade iha Timor Leste. Tempu to’o ona presiza estadu hari’i sistema administrasaun rai ne’ebé modernu hodi hametin direitu nai’n ba rai iha komunidade. Nune bele evita ema kapitalista, politiku no Estadu mak domina rai iha Timor Leste. Estadu labele sai nai’n ba rai maibe Estadu bele administra deit konába oinsa sidadaun ida bele asesu ba uza rai. DNTPSC núdar institúisaun Estadu nian iha knár regúladora asúntu asesu ba rai nian. Tan ne’e DNTPSC presiza familiariza prosesu administrasaun rai iha komunidade atu garante direitu asesu ba rai hodi prevene konflitu kona ba rai iha komunidade.

Rekomendasaun

Atu Asegura Estadu Timor-Leste Sai nudar estadu de direitu demokratiku nomos hanesan estadu ne’ebé garante direitu ne’ebé hakerek iha konvensaun direitus umanus ne’ebé timor-leste ratifika tiha ona. Tuir mai hakark hato’o rekomendasaun ba entidades estadu sira atu konsidera hodi bele foti medidas tuir ida-idak nia kompotensia hodi bele hadia liu tan kondisaun direitu umanu povu nian iha futuru. Rekomendasaun espesiefiku kada asuntu ne’ebé identifika mak hanean tuir mai ne’e:

  1. Governu presiza aplika prosedimentu sira tuir lei numeru 8/2017 kona ba espropriasaun tanba utilidade publiku.
  2. Governu presiza promove partisipasaun koletiva povu nian ba iha planu dezenvolvimentu sira, particular iha projetu konstrui Sidade  Universitaria, presiza rona komunidade sira nia opsaun sira.
  3. Governu presiza aselera planu realojamentu ne’ebé integradu ne’ebé ikus mai la lori impaktu sosial negative ne’ebé estruturada ba komunidade sira nia moris.
  4. Governu presiza aselera produsaun politika ordenamentu territoriu, nune’e hodi define area ka zona sir aba dezenvolvimentu nian.
  5. Governu presiza halo estudu investigative ida kona ba impaktu sosial, ekonomia, kultura no ambiente.
  6. Husu ba Governu, liu-liu Ministeriu Agrikultura atu labele nonok deit nudar aktu fase liman no tenki foti pozisaun ruma atu bele salva rai ida ne’ebé konsidera hanesan zona produtividade ba produsaun.

Referensia :

Konstituisau Repúblika Demokrátika de Timor-Leste Vigora iha 20 de Maio 2002.

Lei No.8/2017 kona ba Lei Espropriasaun tanba Utilidade Públiku Versaun-Tetum, Ministériu da Justisa, 2014.

Regime Espesial ba Definisaun Titularidade Bein Imovel , Lei No 13/2017 De 5 de Junho.

Konvensaun Internasional Direitu ekonommia sosoial no kultura Lei Nu 1/2003 de 10 de Dezembru.

Instrumentu Internasional Direitus Umanus Prepara husi Unidade Asesoria Direitus Umanus Nasoins Unidas iha Timor-Leste Dezembru 2015.

http://redebarai.org/
Print Friendly, PDF & Email

LEAVE A REPLY

Please enter your comment!
Please enter your name here