Home Notisia SEJD Lansa Programa Estímulu Emprendedorizmu Sosiál Juventude Suku

SEJD Lansa Programa Estímulu Emprendedorizmu Sosiál Juventude Suku

1537
0
SEJD lansa programa estimulu Emprendedorizmu Sosiál Juventude. [Foto: Santina Lucia da Costa | 15.07.2021]

Reportajen Santina Lucia da Costa

Sekretáriu Estadu Juventude no Desportu (SEJD), Abrão Saldanha Nokosiku lansa Programa Estímulu Emprendedorizmu Sosiál Juventude Suku, ho tema oportunidade ba moris, ba dezenvolve juventude nia kapasidade emprendedorizmu no haboot kapasidade produtivu,

Iha diskursu Sekretariu Estadu Juventude no Desportu (SEJD), Abrão Saldanha Nokosiku hateten programa no kometimentu ida ne’ebé mak VIII Governu Konstitusionál iha ba joven sira, mak atu lori joven sira ba hala’o atividade produtivu, hodi kontribui ba dezenvolvimentu ekonómika, no kontribui ba prosesu rekuperasaun ekonómika ne’ebé governu hala’o daudauk iha territóriu tomak.

Abrão Saldanha Nokosiku hatutan programa Estímulu Emprendedorizmu Sosiál, juventude suku sei fó espasu ba joven Timor oan sira, atu esplora sira nia poténsia no espresa sira nia kapasidade nu’udar forsa kriativa ida, ne’ebé bele kontribui ba komunidade no nasaun nia dezenvolvimentu ekonomia no sosiál.

“Vantajen demográfika ida ne’ebé Timor-Leste iha mak pur volta 75%  husi ita nia populasaun ho idade menus husi tinan 35. VIII Governu Konstitusionál konxiente katak realidade ida ne’e oferese poténsia no oportunidade boot ba ita nia dezenvolvimentu,” hateten Sekretáriu Estadu Abrao Saldanha iha Aissirimou, Munisipiu Aileu.

Sekretáriu Estadu hatutan lansamentu ba programa estímulu emprendedorizmu sosiál juventude suku, mai husi governu nia rekoñesementu katak joven sira iha papél importante iha ita nia dezenvolvimentu sosio-ekonomiku no mós governu nia hakarak, atu joven sira bele hare ida ne’e hanesan oportunidade ba moris no oportunidade ba dezenvolve sira nia kapasidade emprendedorizmu.

“Ha’u apela ba ha’u nia maluk joven sira iha Timor-Leste laran tomak, atu hakbesik-an ba centru juventude sira iha imi idak-idak nia munisípiu, aproveita oportunidade no rekursu ida ne’e ho di’ak atu hatudu katak ita joven sira ajente kriativa ne’ebé iha kbiit duni, atu dezenvolve ita nia rai doben Timor-Leste,” konklui Sekretariu Estadu iha lansamentu ne’ebe hala’o iha Aileu vila, loron-15/7.

Programa Estímulu Emprendedorizmu Sosiál Juventude Suku, governu implementa liu husi parseria ho centru juventude sira iha territóriu laran tomak. Programa ida ne e disponibiliza apoiu finanseiru ne’ebé mak jere husi centru juventude sira, ba joven sira nia atividade produtiva iha area agrikultura, asesu ba merkadu, formasaun kona-ba produtividade, dezenvolvimentu no promosaun fatin turístiku no konservasaun meiu-ambiente.

Iha fatin hanesan, Manager Sentru Juventude Aileu, Jose Valente hateten programa ida ne’e, fó esperansa boot ba joven sira, atu labele sai opozisaun ba governu, maibé sai solusaun ba dezafiu governu, estadu, família no komunidade no igreja nian.  Governu liu husi programa ida ne’e, atu haboot liu tan inisiativa, atu fó motivasaun ba ita nia juventude sira ne’ebé iha kriatividade oioin iha areas rural.

“Iha tinan 2019 dadus povu Aileu nian 5651 no horseik simu fali dadus estatístika katak juventude Aileu tuir polítika Nasionál Juventude, idade agora daudauk ita hetan juventude Aileu iha 17.601, agora iha Aileu SEJD sei apoiu orsamentu $45 mill, signifika ita sei simu proposta husi juventude sira iha Aileu 45 grupu, wainhira haree iha estrutura grupu nian, mai ho grupu ema na’in 5 de’it, signifika iha 225 juventude mak sei preokupa maka’as los ho atividade ne’ebé sira iha.” afirma Jose Valente.

Nia hatutan hamenus uitoan dezempregu, sira preokupa hela ho buat sira ne’e, governu tulun juventude sira atu joven labele involve maka’as krime sira.

Lansamentu Nasionál ne’e hetan partisipasaun husi Komisaun A Parlamentu Nasionál, Adjuntu Administradór Munisípiu Aileu, Manager Centru Juventude Munsipiu 12 inklui RAEOA, no komunidade sira.  

Print Friendly, PDF & Email

LEAVE A REPLY

Please enter your comment!
Please enter your name here