Home Notisia Sede Suku Loi Lubo-Vemasi Kondisaun Grave, Husi Tempu Indonesia To’o Agora La...

Sede Suku Loi Lubo-Vemasi Kondisaun Grave, Husi Tempu Indonesia To’o Agora La Hadi’a

307
0
Sede Suku Loi Lubo-Vemasi Kondisaun Grave. [Foto: Joselina | 08.12.2021]

Autoridade Suku Loi-Lubo, Postu-Administrativu Vemasi, Munisípiu Baucau husu ba VIII Governu atu bele tau matan ba sira nia fatin sede Suku Loi-Lubo,  tanba hahu husi Indonezia nia tempu to’o ohin loron Sede Suku seidauk hadi’a, no daudaun  ne’e ho kondisaun grave tebes, tanba iha tempu udan no anin boot sira labele hala’o atividade suku nian.

Xefe Aldeia Caetaranau, Pascoal de S. Correia hateten kondisaun suku ne’e, iha ami nia maluk sira nia mandatu hato’o ona proposta iha tinan 2019 katak,  suku hirak ne’ebé mak grave iha Munisípiu Baucau komesa identifika mak iha Postu Vemasi, iha Suku rua mak hanesan suku Uai-Gae ho Loi-Lubo maibe ate agora seidauk iha resposta.

“Nu’udar autoridade bu’at ne’ebe ita iha bele uza, tanba ita labele halo milagre, husu nafatin ba VIII Governu tanba ita haree ministériu balun iha kondisaun di’ak. Maibé ami sira ne’ebé iha suku ne’e hasoru difikuldade barak, hasoru povu nia aspirasaun no lamentasaun, ko’alia kona-ba fatin suku ne’e mos afeta ba ami nia vida no afeta mos ba komunidade, tanba sira mai halo dokumentu mak hetan dezastre ne’e ami autoridade mak kulpa,” dehan Xefe Aldeia ba Neon Metin iha Sede Suku Loi-Lubo Postu-Administrativu Vemasi Munisípiu Baucau, 6/12.

Autoridade ne’e hatutan, sira iha planu atu hadi’a sede suku, maibé laiha orsamentu, Xefi Aldeia husu  ba parte relevante, karik iha ona planu iha tinan 2022 no 2023, sekarik ami nia mandatu remata bele entrega ba maluk sira seluk, hodi bele uza atu atende ba povu nia nesesidade.

Delegada Ana R. da Silva sente triste tebes tanba Sede suku Loi-Lubo besik tinan 30 ona ho kondisaun ne’ebe grave tebes. Tanba bainhira iha tempu udan hakarak ka lakohi Autoridade sira tenke para serbisu, tanba uma laran bokon hotu, baki sira ne’e ida-idak rahun susar atu ba oin.

Bainhira iha tempu udan mak komunidade sira atu halo dokumentu urjente ruma, pasiénsia ami esforsu oinsá bele atende sira.

Delegada ne’e husu ba parte relevante, se bele hadi’a sira nia sede suku, hodi bele atende ba komunidade sira nia nesesidade, tanba sede suku ne’e grave tebes, iha tempu udan sira halo enkontru ruma iha laran ne’e tauk, tanba bainhira udan boot baki sira ne’e namtate arbiru.

Print Friendly, PDF & Email

LEAVE A REPLY

Please enter your comment!
Please enter your name here