Reportajen Adroaldo “Saretukau”
Loron 19 Marsu, loron ne’ebé sidadaun hotu hein hodi ezerse sira nia direitu de votu hodi hili Prezidente Repúblika foun ba Timor-Leste períodu 2022-2027. Povu Postu Laclubar, munisípiu Manatuto mos sente haksolok no entoziazmu ho festa demokrásia ida ne’e hodi ezerse sira nia direitu no hato’o mos sira nia lian ba Prezidente foun atu tau matan ba povu nia moris.
Povu Laclubar, Maria da Costa Almeida hafoin ezerse nia direitu de votu, hato’o ohin loron 19 Marsu loron festa demokrásia nia delega hela nia votu ba PR foun hodi bele tau matan ba povu nia moris.
“Demokrasia la’os tanba kontente, la’os festa hodi haksolok nian maibé hanesan ha’u delega ha’u nia votu ida ba Prezidente foun ne’ebé karik manan, lori netik ami povu, liu-liu ba ami povu kiak, povu nia terus, feto-faluk oan-kiak sira nomos ba ami sira ne’ebé kuran liu-liu bee, ahi ba ami nia moris nomos estrada,” hatete Maria ba Neon Metin hafoin vota.
Nia hatutan, karik Prezidente foun mai, bele tau matan ba estrada ne’ebé liga ba sira nia to’os hodi fasilita sira no, “estrada ne’ebé liga ba iha ami nia to’os, hanesan ami halo to’os dook, ami forma tiha grupu ami nia to’os ne’e dook, ami hakarak ajuda netik de’it estrada oan ida, dalan oan ida, luron oan ida ba tama ami nia to’os para fasilita ami nia produtu lokal ba iha merkadu, bainhira Prezidente foun bele lori,” tenik nia.
Iha parte sorin, Felix da Conceição hatete ohin loron ami orgullu, tanba loron espesial ami ba vota hodi hili Prezidente ida ne’ebé aban bairua bele hadi’a povu ida ne’e iha nasaun Timor-Leste.
“Ami husu ba Prezidente foun wainhira manan iha eleisaun, bele hadi’a povu nia moris i liu-liu haree iha agrikultura, tau matan ba sosiedade sivíl sira ne’ebé ho sira nia vontade rasik, atu halo knaar hodi halo rekoperasaun ekonomia,” dehan Felix ba Neon Metin.
Nia hatutan, ba Prezidente Repúblika foun hadi’a povu nia moris no tau matan mos ba veteranu sira ne’ebé seidauk simu pensaun, tanba durante ukun aan kleur ona sira seidauk hetan pensaun ida ne’e.
“Ami balu seidauk hetan liberdade tanba ami seidauk hetan apoiu (pensaun veteranu) ruma hosi governu. Ne’e duni Prezidente foun kuandu sa’e, ami husu atu tau matan ba ema hotu tanba, ema hotu mak luta ba rai ida ne’e, ema hotu mak luta ba povu ida ne’e, hodi hetan ona libertasaun nasional,” Felix dehan.
Iha parte sorin inan-faluk, Virginia Soares hato’o nia sentimentu haksolok ba loron votasaun ida ohin maibé nia kontente hanesan feto-faluk oan-kiak, no husu atu tau matan sira nia moris, hanesan halo netik karidade ba sira.
Nune’e mos ba Florindo do Esperito Santo, hanesan ema ho difisiénsia fíziku, hatete nu’udar sidadaun Timoroan sente kontente tanba ita bele realiza ita nia votasaun ba eleisaun prezidensiál nian.
“Nu’udar ema ho difisiénsia sente kontente karik ida ne’ebé mak sai nu’udar prezidente dezenvolvimentu tenki la’o, nomos ba ema ho difisiénsia fo fatin ba sira atu nune’e sira mos bele dehan votasaun ida ne’e sente duni ho di’ak,” dehan difisiente Florindo ba Neon Metin.
Iha sentru votasaun Postu Administrativu Laclubar Vila, povu sira haksolok hodi ezerse sira nia direitu votu ba sira nia kandidatu hahú hosi dader no hetan seguransa másimu hosi Polícia Nacional Timor-Leste (PNTL).
