Reportajen David da Costa Gusmao
Konsellu Imprensa (KI) Timor-Leste ne’ebé maka halo monitorizasaun ba kampaña politika ba kandidatu Prezidente Republika (PR) periodu 2022-2027, identika media balun halo kobertura la fó balansu ba kandidatu PR sira, ho ida ne’e KI sei halo notifikasaun no fó samada ba media sira ne’ebé maka komete infrasaun grave ne’e.
Prezidente Interinu Konsellu Imprensa (KI) Timor-Leste Espedito Dias Ximenes, informa, Kuaze semana rua resin iha periódu kampaña polítika, KI halo monitorizasaun no halo análize ba meiu komunikasaun sosiál sira nian iha kontestu kobertura no publikasaun bazeia ba Lei Komsos, Kodigu Étika Jornalístika no prinsípiu jornalizmu universál.
KI nia Rezultadu monitorizasaun no análize durante periódu kampaña polítika no loron votasaun nian hatudu katak Kobertura no publikasaun notisia, programa no reportajen direta (live streaming) meiu komunikasaun sosiál iha periódu kampaña polítika la fó biban balánsu ba kandidatu hothotu, maibé barak-liu foka deit ba figura boot sira no kandidatu sira ne’ebé hetan apoiu husi partidu polítku sira.
“Iha ne’e ami sei la hatudu ba A ka B, mas iha ne’e ami konsellu Imprensa halo avalisaun ho monitorizasaun jerál, Agora ami labele dehan tanba sei iha hela prosesu verfikasaun, depois de verfikasaun hotu maka foin hato’o fali media ne’ebe maka komite iha infrasaun,” Dehan Prezidente Interinu Konsellu Imprensa (KI) Timor-Leste, Espedito Dias Ximenes, liuhosi konferensia Imprensa iha edifisiu KI kintal Boot, Sexta 25/03.
Nia haktuir KI sei notifika ka fó samada ba meiu komunikasaun sosiál ne’ebé komete infrasaun hasoru Kódigu Étika Jornalístika, Lei Komsos, Matadalan Reportajen Eleitoral no Matadalan Midia Sosiál ba Jornalizmu.
Nune’e sei fó sansaun forte ba meiu komunikasaun sosiál sira ne’ebé komete infrasaun “grave” hasoru Kódigu Étika Jornalístika, Lei Komsos, Matadalan Reportajen Eleitorál no Matadalan Midia Sosiál ba Jornalizmu.
“Ami sei halo samada atensaun, atu identifika katak iha iha loron seluk, karik hala’o atividade jornaliztiku, presiza atensau ba iha kode etika jornalismu nian no mós halo reportajem konaba ba elisaun prezidensiál iha elisaun tanba atu tama iha segunda volta, ne’ebe sei hein notifikasaun ne’ebe sei mai, tanba ne’e, karik iha balun-ke komete infrasaun grave, tanba iha analize no monitorisaun ne’ebe KI halo, karik balun ne’ebé komite infrasaun grave sei hetan notifikasaun husi KI, noftikasaun ne’e oinsa depois maka KI fó ba iha media Kovensionál, plataforma online ka depois KI sei hato’o,” esplika nia.
Alende ne’e mós Iha notisia balum ne’ebé KI konsidera sensasionál no provokativu ne’ebé la kontribui ba paz no estabilidade iha railaran tamba nakunu ho opiniaun jornalista ka editór nian konsidera hanesan propaganda polítika iha periódu eleisaun prezidensiál nian.
Entertantu KI mós hetan ka identifika notisia meius komunikasaun sosiál nian balu ne’ebé la sensivel jéneru tuir papél jéneru nian iha kontestu kobertura no publikasaun relasiona ho loron votasaun.
