Home Saude MS ho WFP Distribui Sereál Ba Inan Isin-rua no Inan fo Susu...

MS ho WFP Distribui Sereál Ba Inan Isin-rua no Inan fo Susu ne’ebe sofre Mal-Nutrisaun

75
0
WFP oficial oferese sereal ba inan isin rua. [Foto: Joselina | 11.05.2022]

Reportajen Joselina dos Santos

Governu Timor-Leste serbisu hamutuk ho Governu Xina no Reprezentante World Food Programme (WFP), halo lansamentu distribuisaun Super Cereal ba inan isin-rua no inan fo Susu, ba sira ne’ebe sofre husi mal-nutrisaun  iha Timor-Leste.

Programa Al-han Mundial (PAM) no Ministeriu Saúde ohin hahú distribui Super Cereal, ai-han fortifikadu riku ho vitamina no mineral ba grupu vulneravel  sira. Super Cereal hamutuk tonelada 535 mak sosa ho fundu husi kontribuisaun Governu Xina no sei distribui ba inan isin-rua no inan fó susu iha 13 munisípiu, inklui Rejiaun Espesial Administrativa Oecusse Ambeno (RAEOA).

“Distribuisaun ai-han suplementu refere sei la’o durante periodu fulan 4 nia laran, no ho apoiu fundu ne’ebé iha asegura tiha ona ai-han suplementu refere ba períodu tinan ida,” Dehan Ministra Saúde Odete Maria Freitas Belo, iha serimonia Lansamentu Super Cereal iha Centro Saude Metinaro Munisipiu Dili, 11/05.

Nia dehan akordu kontribuisaun entre Governu Repúblika Popular Xina no WFP konabá asisténsia ai-han ba Timor-Leste mai iha tempu ne’ebé los, tanba komunidade barak mak enfrenta hela difikuldade ba nesesidade ai-han  impaktu husi pandemia no dezastre naturais hanesan siklone seroja akontese tinan kotuk.

Iha fatin hanesan Embaixadór Xina Iha Timor-Leste Xiao Jianguo hatete problema seguransa ai-han mal-nutrisaun kontinua sai dezafiu bo’ot ba populasaun liu 1/3 mak sofre ba inseguransa ai-han. Labarik tinan 5 mai kraik hamutuk 47% mak nia altura la tuir nia idade, no isin ki’ik ka menus todan hamutuk 32% no 38% inan ho idade reprodutiva (tinan 15-49) maka sofre ba anemia. Nune’e distribuisaun ne’ebé ohin lansa ne’e, hanesan parte husi WFP nia programa ai-han suplementu atu kombate mal-nutrisaun.

“Xina iha relasaun di’ak tebes ho WFP no fó asisténsia umanitária ne’e nu’udar ami nia prioridade ida mos. Ho inundasaun ne’ebé akontese tinan kotuk iha fulan Abríl no impaktu atuál husi krize ai-han global difikulta tebes inan isin-rua no inan fo susu sira atu asesu ba ai-han nutritivu ne’ebé adekuadu iha Timor-Leste,” hateten  Embaixadór Xina iha Timor-Leste Xiao Jianguo.

Nia hatutan ho kontribuisaun ida ne’e, espera ita bele hadi’a feto no família sira nia moris. Alende fó asisténsia nutrisaun ba inan isin-rua no inan fó susu, tanba Xina mós servisu hamutuk ho WFP hodi hadi’a infraestrutura atu asegura preparasaun merenda eskolár ne’ebé ijiéniku no seguru ba estudante sira.

“Ho impaktu global husi folin sasán sa’e, lakuna seguransa ai-han no nutrisaun iha Timor-Leste aumenta boot. Bazeia ba rezultadu asesmentu sósiu-ekonomia ne’ebé relata husi Governu Timor-Leste hatudu katak uma kain hamutuk 38% mak redús kualidade dieta nutritivu, no ema kbiit laek sira balun la konsege han pelumenus loron ida dala tolu, tanba menus rendimentu no rekursu,” nia tenik.

Reprezentante WFP iha Timor-Leste Dageng Liu hatete, konflitu iha Ukránia aumenta tan presaun hodi kauza folin sasán sa’e globalmente, no Situasaun ida ne’e ezije ema nia abilidade atu asesu ai-han ne’ebé adekuadu. Onra boot tanba sira bele servisu hamutuk ho Ministériu Saúde hodi fó asisténsia ai-han nutritivu ba ema vulneravel sira iha tempu ne’ebe sira presiza tebes, ba misaun salva moris iha nasaun ida ne e.

Print Friendly, PDF & Email

LEAVE A REPLY

Please enter your comment!
Please enter your name here