Home Notisia OXFAM Realiza Media Tour, Lori Jornalista Sira Ba Area Rural Hodi Kobre...

OXFAM Realiza Media Tour, Lori Jornalista Sira Ba Area Rural Hodi Kobre Asuntu Agrikultura

149
0
Ekipa jornalista ho Oxfam hasai foto hamutuk antes dezkola ba Munisipiu. [Foto: Zevonia | 10.05.2022]

Reportajen Santina Lucia da Costa

Oxfam Timor-Leste realiza Media Tour, ho instituisaun media sira, hodi halo kobertura iha Munisípiu Ainaru ho Baucau kona-ba atividade agrikultura sira, liu-liu joven ho agrikultura, ema defisiénsia ho agrikultura no feto ho agrikultura, ho habelar informasaun no fó atensaun ba governu hodi investe iha setór agrikultura no setór produtivu sira seluk.

Iha konferénsia imprensa ne’e,  Reprezentante Oxfam iha Timor-Leste, Adilson da Costa Junior hateten programa Media Tour ne’e, ho objetivu atu esplora informasaun sira liga ho atividade agrikulturane’ebé mak durante ne’e maluk agrikultór sira halo iha baze, no mós bele utiliza informasaun sira ne’e informa ba polítiku na’in sira, no governante sira atu bele hadi’ak liu tan saida mak governu tenke halo, atu apoiu no dezenvolve setór agrikultura iha baze.

Adilson dehan Media Tour ne’e, haree liuliu ba problema sira ne’ebé liga ho irrigasaun, estrada no Bee-Moos bele fasilita agrikultór sira hodi halo natar, toos no atividade agrikultura sira seluk.

Nia dehan Projetu Hadalan nu’udar projetu ida ne’ebe durante apoiu lian oioin, grupu agrikultura, ema ho defisiénsia, grupu joven sira no serbisu hamutuk ho jornalista sira, atu habelar liu tan informasaun sira ne’ebé serbisu agrikultura iha bazé, no mós kontinua fó atensaun ba governu, importante duni governu tenke investe iha setór agrikultura no setór produtivu sira seluk.

“Ami hanoin katak, media tour ne’ebé ohin ita lansa hamutuk, kolega sira ba vizita Munisípiu Ainaro ho Baucau, hodi diretamente ko’alia ho toos na’in sira, grupu joven sira ne’ebé involve atividade agrikultura no grupu feto sira, ema ho defisiénsia sira, sira nia lian, sira nia hanoin bele lori ba públiku no politiku na’in sira, atu nune sira bele konsidera katak, ba oin iha orsamentu tinan 2023, governu tenke tau atensaun no halo investimentu boot liu tan ba setór ida ne’e.” Hateten Adilson da Costa Junior iha Oxfam, Tersa-Feira, 10/05.

Nia hateten Oxfam Timor-Leste serbisu hamutuk Lafaek News, no media instituisaun sira seluk, hamutuk 10 hodi halo programa media Tour. Viajen ba media Tour ne’e sei hala’o durante loron rua iha Munisípiu Ainaru ho Baucau.

Media Tour ne’e realiza husi OXFAM Timor-Leste serbisu hamutuk ho Lafaek News no Asosiasaun Jornalista Timor Lorosa’e (AJTL), no hetan apoiu finanseiru husi Governu Australia liuhusi projetu Governasaun ba Dezenvolvimentu (GfD).

Print Friendly, PDF & Email

LEAVE A REPLY

Please enter your comment!
Please enter your name here