Home Feature Ines Orgullu Moris Hosi Faan Modo, Oan Sira Konsege Eskola no Hetan...

Ines Orgullu Moris Hosi Faan Modo, Oan Sira Konsege Eskola no Hetan Serbisu

1154
0
Jornalista Neon Metin Helen Pereira dadalia ho Ines de Jesus. [Foto: 03.09.2020]

Reportazen Helen Pereira

“Sente kontente los tamba liu husi faan modo ida ne’e mak nia oan sira serbisu hotu no iha oan rua  mak sei eskola, ida iha sekundaria no ida iha universidade”. Ines de Jesus

Moris nudar vendedor mak dalan ida ne’ebe ema balun hili, hodi bele sustenta sira nia moris, faan modo, faan hahan no seluktan hodi bele hetan netik dollar ida, maske dalaruma labele hetan rendimentu, maibe ho pasensia kontinua halao knaar ne’e.

Inan feto ida hosi municipiu Ainaro, Ines de Jesus ne’ebe mak hatutan nia moris liu hosi faan modo matak iha terminal Same vila, ba Neon Metin Ines hateten katak nia faan modo hodi bele sustentania oan sira nia eskola

Ines iha oan nain lima, feto rua no mane tolu, maske Ines sente koleng ona maibe nesesidade uma laran ezije nia tenke kontinua buka moris.

‘’Hau mesak deit mak faan modo, la iha ema ida mak mai ajuda hau, tamba hau nia oan sira eskola hotu no dook husi hau, nain ida mak ho hau maibe nia mos preokupa ho nia eskola, hau faan modo hotu, fila uma sei halo servisu uma laran nian’’, tenik Ines ba Neon Metin iha merkadu Same vila 31\08.

Ines dehan modo ne’ebe nia faan, hau sosa fila fali husi ema ne’ebe mak hau kontratu ona, ema faan  $1.00 maibe hau faan fila fali rua $1.00 atu nune hau bele manan $0.50 cen.

Ines hatoo nia sentimentu katak maske dalaruma sente koleng, maibe nia esforsu an hodi kontinua halo serbisu hamutuk hasoru dezafiu sira ne’e.

“Sente kontente los tamba liu husi faan modo ida ne’e mak nia oan sira serbisu hotu no iha oan rua  mak sei eskola, ida iha sekundaria no ida iha universidade”, hateten Ines ho orgullu.

Habain an iha loron manas, rai rahun no fatin ne’ebe la dun moos maibe Ines la preokupa ida ne’e, tanba nudar inan nia iha responsabilidade ida, hodi lori nia oan sira nia futuru ne’ebe naroman liu.

“Se hau la faan modo, se mak atu hare hau nia oan sira ne’ebe sei eskola, se laos hau, se tan”, tenik Ines.

Ines hateten maske nia oan nain tolu serbisu ona, maibe nia kontinua faan modo, tanba liu hosi faan modo mak ohin loron sira bele serbisu no tanba nia toman ona faan modo.

Ines lor-loron faan modo hahu hosi dader to’o kalan, rendimentu ne’ebe nia hetan loron ida  kiik oan los, se sorte diak bele hetan to’o $30.00.

‘’Molok hau mai faan modo, iha dader hau halo serbisu uma laran nia hotu lai, nune hau hamlaha bele ba han tiha mak mai fali”, tenik Ines

Ba Neon Metin Ines hatoo nia sentiment orgullu tanba hosi kosar ne’ebe nia hikis mak ohin loron nia oan nain tolu bele susesu.

*(Helen Pereira nudar estajiadu iha media RENETIL – Neon Metin)

Print Friendly, PDF & Email

LEAVE A REPLY

Please enter your comment!
Please enter your name here