Reportazen Francisco JDA
Bee Moos mak ema nia moris, bee moos sai nesesidade fundamental ba ema hotu, bainhira ema la asesu bee moos ne’e, bele dehan ema sei moris mukit no kiak. Komunidade sira ne’ebe susar atu asesu bee moos kontinua halerik.
Relasiona ona problema bee moos, deputadu hosi bankada Partidu Libertasaun Popular (PLP), nudar membru Komisaun permanente, Abel Pires liu hosi sesaun plenaria hatetetn bee moos kontinua sai problema iha sosiedade.
Abel Pires dehan iha proposta ida kona ba perfurasaun bee moos iha aldeia Lokeu leten, Municipiu Covalima maibé proposta ne’e rasik to’o agora seidauk iha solusaun.
“Ha’u hanoin proposta ne’e tama ona iha kategoria emergensia, tanba desde kedas tempu Portugés no Indonesia nian la konsege, halo ita ukun an tinan 20 resin la konsege halo, tanba aldeia ne’e iha leten liu, entaun sira labele hetan bee moos tanba sira iha parte kraik liu”, dehan Abel Pires iha Parlamentu Nasional, 02/09.
Tuir informasaun ne’ebe deputadu Abel rekolla katak, proposta ne’e hatama kedas desde inisiu tinan ida ne’e, no ohin tama ona Septembru, maibe sedauk iha informasaun ruma hosi ministerium relevante, hodi tau matan ba povu sira nia nesesidade.
Iha fatin hanesan Deputadu hosi bankada FRETILIN, David Dias Ximenex mós kestiona konaba bee moos la’ós de’it iha area remotas, maibé iha sidade Dili laran difisil tebes, iha sidade Dili de’it mós problema bee móos ona, oinsá mak bele halo kobertura ba maluk sira ne’ebé iha area remotas.
Tuir dadus ne’ebé Neon Metin asesu katak bee moos iha area urbana Asesu ona bee mos ho 80% no iha rural atinji 71%, maibé realidade hatudu katak komunidade barak seidauk asesu bee moos no kontinua halerik ba bee moos.
