Reportajen Santina Lucia da Costa
The Workforce Development Program Timor-Leste (WDPTL) halo enkontru ho media online sira, hodi halo diskusaun no haree posibilidade atu serbisu hamutuk, halo desiminasaun informasaun kona-ba problema dezempregu no oportunidade kria serbisu ba foinsa’e sira.
Hamosu enkontru ne’e, tanba The Workforce Development Program Timor-Leste (WDPTL) serbisu hamutuk ho Sekretariu Estadu ba Formasaun Profisional no Emprego (SEFOPE), atu redús dezempregu ba foinsa’e sira iha Timor-Leste. Objetivu diskusaun ne’e haree posibilidade atu serbisu hamutuk halo deziminasaun informasaun kona-ba problema dezempregu no oportunidade kria serbisu ba foinsa’e sira.
Hafoin enkontru, Training and Employment Specialist, Geraldo Sarmento Ximenes informa, enkontru ne’e fahe informasaun ba malu kona-ba kestaun dezempregu iha Timor-Leste, oinsa buka solusaun hamutuk no media nia papél maka oinsá fahe informasaun ba juventude sira, ne’ebe susesu iha sira nia karreira, bele fahe informasaun ba públiku, bele inspira juventude sira buka formasaun ka serbisu no bele mós kria serbisu ba sira nia-an rasik.
Geraldo Sarmento Ximenes dehan ba oin dalan ba hetan empregu sei kontinua nafatin enkoraja koordena ho media sira kontinua fó informasaun ba públiku, oinsa kria mekanizmu foti asaun ba dezempregu iha Timor-Leste.
“Ema ne’ebé susesu hau labele dehan agora, maibé ema susesu ne’e kuaze ita bele dehan 2 to’o 5%, husi Australia sira, ba eskola no serbisu iha ne’eba, sira mai fali balun serbisu no loke negosiu hodi kontribui ba ita nia rai.” Afirma Geraldo Sarmento Ximenes, iha edifisiu WDPTL, Bidau, Akaderihun, 2/12.
Geraldo hatutan balun ne’ebé ba serbisu iha Australia mós hanesan, balun mai aneksa fali ba sentru formasaun, setór privadu, balun hadi’a ekonomia família ninian no loke serbisu hodi fó serbisu ba ema seluk.
Geraldo hateten media sira ohin halo enkontru ne’e, sira sente di’ak, atu bele koopera ne’e bele la’o ba oin, fó informasaun ida di’ak ba juventude sira. Sira mos rekoñese katak, dadus ne’e importante ba sira hodi fó informasaun klaru.
“Hau mos aseita katak, bainhira media fó informasaun karik tenki iha dadus, ita sei fornese dadus ne’e ba malu. media bele fo sai ba publiku, liuliu iha objetivu rua mak hanesan, oinsa inspira joventude sira, kapasita-an hodi bele hetan bolsus estudu, no mos ba serbisu iha Australia. No enkoraja joventude hadomi sira nia-an.” Dehan Geraldo.
Media Online ne’ebé Partisipa iha enkontru ne’e mak hanesan, Tatoli.ip, Neonmetin.info, The Oekusi Post, no Lafaek News.
