Reportajen Umbelina dos Reis
Centru Nasional Chega!, (CNC, I.P) ho Institutu Nasionál Formasaun Dosente e Profisionais Edukasaun (INFORDEPE) fó formasaun ba Professores Ensinu Baziku II siklu, kona-ba konteudu Chega iha istoría Direitu Umanu.
Diretór Divizaun Edukasaun no Formasaun Edukasaun CNC,I.P, Vicente Borges Maia hateten formasaun ne’e hanesan programa ida husi Ministériu Edukasaun Juventude no Desportu (MEJD), nian liuhusi Institutu Nasionál Formasaun Dosente e Profisionais Edukasaun (INFORDEPE) hamutuk ho Centru Nacional Chega, Institutu Publiku (CNC,I.P) hodi fó formasaun ba Profesores sira kona-ba prosesu luta ba Libertasaun Nasional.
“Bazeia ba avaliasaun Centru chega hamutuk ho Ministeriu Edukadaun halo ba professores ensinu baziku sira katak sira presija tan materia suplementar formasaun no ohin ita realiza duni formasaun ida ne’e liu husi INFORDEPE.”dehan diretór Divizaun Edukasaun no formasaun CNC, I.P, Vicente iha salaun CNC, Segunda 10/09.
Nia haktuir Centru Nasional Chega nia planu ne’e foka liu ba Professor sira sestu ano tan sira mak hanorin materia hotu liu ba materia istoría no direitu umanu no matéria ne’ebe mak fó formasaun ba professores sira mak istória ho direitu umanu.
Nune’e mós nia husu ba professores sira atu aproveita Formasaun ne’e ho di’ak hodi bele aumenta tan koñesimentu hodi bele ba partilha fali ba alunus sira.
Iha fatin hanesan Vice-Prezidente Gabinete Formasaun Profisional, kontinua, Rui da Costa Belo, hateten husi parte INFORDEPE hanesan responsabiliza ba formasaun profesores nian, tanba formasaun ba profesores ne’e importante tebes hodi bele hasa’e professores sira nia koñesimentu ba iha istoria Timor-Leste hodi hanorin fali estudante sira.
“Hau hanoin formasaun ohin ne’e importante tebes livru balun iha tiha ona, maibé ida ne’e ita nian formadores sira atu hanorin kona-ba istória 1975 nian sae mai ne’e, liliu ba iha Direitu umanu nian”, dehan Rui.
Nia haforsa tan formasaun ne’e importante ba professores sira tanba sira mak sei transmite fali istória sira ne’e ba Jerasaun foun sira, tanba jerasaun foun sira ne’e tenkí hatene kle’an kona-ba istória Timor-Leste nian, tanba prosesu liberta pátria Timoroan barak mak oho fali malu no la hatene kona-ba direitus umanu.
“Uluk tinan 1975 oho malu, FRETILIN oho APODETE, UDT ida-idak ho nia razaun, tanba ne’e professores sira tenkí hanorin di’ak hodi labele kria fali konflitu iha jerasaun foinsa’e ka jerasaun foun sira balun rona istoria la los bele hamosu fali konflitu”, nia esplika.
Centru Nasional Chega, Institutu Publiku (CNC,I.P) tinan ne’e iha planu fo formasaun ba Professores ensinu II siklu totál hamutuk 115 husi Municipiu 11 la inklui RAEOA ho Dili.
Entertantu ohin partisipa iha formasaun ne’e professores husi Ensinu Baziku II siklu, hamutuk 58 no formsaun ne’e hahú iha loron 10 no remata iha 15 Outubru 2022.
