Reportajen Joselina dos Santos
Governu Liu husi Komisaun Funsaun Publika (KFP), servisu hamutuk ho Ministériu Saúde (MS), hodi realiza serimónia “Lansa Primeiru Progresaun Eskalaun ba Profisionais Saúde hanesan Médiku, Enfermeirus, Parteira no Tékniku Aliadu” ho objetivu atu fó motivasaun ba profisionais saúde sira no hanesan mós direitu nu’udar funsionáriu públiku.
Iha diskursu Ministra Saúde. Dra. Odete Maria Freitas Belo hatete programa VIII governu Konstitusionál, iha área saúde aprezenta pillar importante hitu (7) mak hanesan Governasaun ka jestaun ba setór saúde, prestasaun ba kuidadu saúde primária no saúde ospitálar, servisu suporta e prestasaun saúde, rekursu umanus, setór saúde, transporte operasionál no ambulánsia, infraestrutura iha setór saúde no finansiamentu sistema nasionál saúde.
“Ita hotu hatene, atu implementa programa sira ne’e hotu, pillar importante mak presiza rekursu umanus ida ne’e mak profesionais, apropriadu adekuadu ho matenek no espíritu matenek nu’udar badaen na’in saúde hodi implementa atividade Ministériu Saúde ne’ebé hatuur ona iha Planu Estratéjiku Nasionál Setór Saúde (PENSS) 2020-2030”, dehan Ministra Saúde iha diskursu iha Salaun Palacio dos Cinzas Kaikoli, 10/10.
Governante ne’e dehan, maske mundu tomak inklui Timor-Leste ne’ebe foin dadaun sofre ho pandemia Covid-19 no atual iha laran hodi hasoru dezafiu oin-oin atu hatan ba kuidade saúde populasaun Timor-Leste nian, tan ne’e ita kontinua haforsa servisu parte rekursus hanesan kria kondisaun iha postu saúde kompostu husi profisionais, kria kondisaun iha aldeias, investe kompeténsia profisionais, kapasidade teknika rekursu umanu saúde nian.
Nia konklui sei koopera no servisu hamutuk ho instituisauun formasaun Ensinu Superior no Miniteriu Ensinu Superior, Siénsia Kultura (MESSK), hodi halo revizaun ba kurikulu ensnu superior ne’ebe destinadu ba formasaun profisionais saúde nian.
Nune’e mos sei kontinua kapasita institutu nasional publika, hodi sai nu’udarr observador saude publika, investigasaun no peskiza nian, inklui mos implementa planus kuadrus pesoal rekursu umanu no regula padraun kodigu konduta profisionais saúde iha setór saúde.
