Reportajen David da Costa Gusmao
Primeiru-Ministru (PM) Taur Matan Ruak, no Diretora Ezekutiva Kompañia Petrolífera Woodside, Meg O’Neill, iha kinta 6 Outubru 2022, hala’o enkontru liuhosi virtual ida pozitivu tebes hodi diskute kona-ba prosesu dezenvolvimentu projetu estratéjiku iha Kampu Greater Sunrise nian.
Durante enkontru iha 30 minutu ne’e, Xefe Governu agradese no apresia Woodside ba parseria durante ne’e ho Governu Timor-Leste iha atividade petrolífera nian hodi akresenta, Governu Timor-Leste kontinua iha intrese parseria ho Woodside ba futuru mai, ba viabilizasaun projetu estratéjiku Greater Sunrise hodi bele kontribui hasai povu Timor-Leste hosi kiak, tanba Timor-Leste kuaze depende ba Fundu Petrolífera iha prosesu dezenvolvimentu nasionál.
“Deskobrimentu ba kampu Gretar Sunrise hahú kedas iha tinan 40 ba kotuk, maibé to’o a data seidauk dezenvolve, halo parte sira ne’ebé envolvidu lakon rekursu barak, tanba ne’e agora momentu loos oinsá hetan solusaun ida di’ak ba dezenvolvimentu Greater Sunrise nian,” Dehan Xefe Governu Taur iha Komunikadu Imprensa ne’ebé Neon Metin asesu husi Gabinete PM Segunda 10/10.
Primeiru-Ministru fiar katak Woodside, Timor Gap no parseiru joint venture sira bele halo esforsu tékniku ne’ebé rápidu nune’e bele realiza projetu boot ida ne’e lais liu di’ak liu hodi fó benefísiu ba povu Nasaun rua nian, Timor-Leste, Austrália no parte envolvidu sira.
Ikus, Xefe Governu afirma, Governu Timor-Leste sei halo buat hotu serbisu hamutuk ho Governu Austrália hodi viabiliza no ajuda projetu refere bele implementa.
Enkuantu Diretora Ezekutiva Woodside, Meg O’Neill sente kontente no orgullu bele ko’alia direta ho Primeiru-Ministru Taur Matan Ruak hodi fahe hanoin no ideas kona-ba prosesu dezenvolvimentu Greater Sunrise nian, Nia haktuir, Woodside kontente serbisu hamutuk ho Governu Timor-Leste iha atividade esplorasaun petrolífera nian.
Nune’e mós Diretora Ezekutiva Woodside ne’e mós agradese ba Primeiru-Ministru Taur Matan Ruak ba komitmentu no esforsu sira ba esplorasaun Greater Sunrise nian.
