Loron 4 outubru 2022, sidadaun nain tolu tenta lori osan ho montante $160,000 no Rupiah Indonesia Millaun 40 ba Indonesia. Entidade aeroportu no polisia prende osan ne’e hodi lori ema sira mak diskonfia involve submete ba prosesu investigasaun tan ne’e RENETIL deklara liu hosi konferensia imprensa ohin (13/10) hodi fo nia apoio tomak ba prosesu investigasaun.
Senhor José Bukar, Konselleru Maximu Partidu KHUNTO ninian publicamente deklara katak osan ne’e ninian no Adjunto Sekretariu Jeral KHUNTO, Zeto Patricio, iha nia deklarasaun ba SM News foin lalais ne’e hatete katak osan ne’e Partido KHUNTO nian. Bainhira prende ona osan ne’e iha aerportu, membro governo hosi partidu KHUNTO mos marka prezensa, Vice Ministru Justisa, no Vice Ministro Interior. Liu tiha loron hira, hafoin prosesu investigasaun halao dadaun hosi PCIC no submete kazu ne’e Ministeriu Publik, mosu tan publikasaun sira mak hatudu katak iha esforsu atu halo presaun ba prosesu justiça nian hosi membro governo balun.
Ho preokupasaun hirak ne’e mak RENETIL mosu ho nia deklarasaun hodi fo nia apio ba entidade polisia no justiça nian.
“Apoia tomak ba entidade policial no judiciaria sira atu halao sira nia knaar tuir lei haruka no husu ba parte sira nebe envolve iha kazu ne’e atu kolabora didiak ho autoridade policial no judiciaria sira”, Porta-vos RENETIL, Jose Neves Samala-rua hato’o iha nia deklarasaun imprensa, iha Sede RENETIL, Farol, ohin (13/10).
RENETIL mos hakarak husu ba instituisaun Estadu sira nebe hametin lei no ordein, nebe servisu iha linha frente atu prevene no kombate krimes organizadu no krime seluk, ba ukun nain sira, ba partidu politiku, media no ba publiku em geral kona ba tentativa lori osan ba estrangeiru ho total nebe lei bandu wainhira la kumpri regras nebe lei haruka.
Tuir RENETIL wainhira la kombate, krime sira ne’e sei hamosu konsekuensia negativu oi-oin mai Timor-Leste, hanesan hatun integridade no digninade estadu nian iha rai seluk nian oin, instituisaun bankaria Timor-Leste nian sei susar atu hetan kooperasaun ho instituisaun hanesan husi rai seluk (nune’e dificulta no prejudika sidadaun atu haruka no simu osan ba ka husi rai seluk), Timor-Leste sei kontinua hetan predikadu hanesan nasaun ida ho risku a’as ba brankeamentu capital, investidor rai seluk nian sei la iha konfiansa atu investe iha Timor-Leste, no seluk-seluk tan.
