Reportajen David da Costa Gusmao
Asosiasaun Jornalista Timor-Leste (AJTL) fo nia solidariedade ba jornalista sira iha Myanmar ne’ebé to’o agora hetan risku, no mós ba jornalista sira iha Filipina ne’ebéé maka sempre akontese violénsia hasoru jornalista sira.
Liuhusi komemorasaun loron nasionál ba liberdade imprensa iha Balibo, Prezidente Asosiasaun Jornalista Timor-Leste (AJTL) Zevonia Vieira, hateten AJTL fó solidariedade ba maluk jornalista sira iha Myanmar ne’ebe to’o agora hetan risku, ameasa no limitasaun ba liberdade imprensa no espresaun tanba rejime militár iha Myanmar, hodi hamosu violasaun direitu umanus.
Nune’e mós AJTL fó nia solidariedade mós ba jornalista sira iha Filipina ne’ebé sempre akontese violénsia hasoru jornalista sira, liu-liu foin lalais jornalista Percy Lapid ne’ebé hetan oho.
Ho ida ne’e AJTL husu ba estadu Timor atu kontinua aprósima nasaun hirak ne’e iha sudeste aziátiku, hodi respeita liberdade imprensa no espresaun iha Myanmar , tanba iha pasadu ativista no jornalista sira Myanmar no Filipina mos kontribui sira nia an ba luta ukun rasik-an.
AJTL orgullu tanba relatoriu husi Report Without Borders, katak Timor-Leste nia liberdade imprensa kontinua hatudu ezemplu diak iha sudeste aziátiku ho rangking 1 no iha mundu global kontinua hakat ba rangking 17.
“Estadu Timor presiza fo hanoin ba nasaun hirak ne’e atu la akontese tan violénsia hasoru jornalista sira. Tanba Timor-Leste sai ezemplu di’ak ba nasaun sira seluk iha sudeste aziátiku, oinsa liberdade imprensa ho espresaun iha Timor-Leste la’o di’ak,” Hateten Prezidente AJTL Zevonia, liuhosi Konferensia Imprensia Iha Balibo Vila, Domingo 16/10.
Asosiasaun Jornalista Timor-Leste (AJTL) mós kontinua fó sira nia solidariedade ba jornalista sira iha Papua, Palestina no Sahara Osidentál ne’ebe kontinua hasoru risku, akontese Violasaun Direitu umanus limitasaun ba iha Liberdade Imprensa no espresaun iha ne’ebá. Ho ida ne’e hamutuk hodi kontinua Promove liberdade imprensa no espresaun.
“Hamutuk ita kontinua promove liberdade imprensa no espresaun iha Timor-Leste, sai jornalista ne’ebe kritiku liu defende direitu umanus no lian laek sira no lia los sei la mate,” nia akresenta.
Asosiasaun Jornalista Timor Lorosa’e ( AJTL ) nu’udar asosiasaun ne’ebé sai nu’udar mahon ba jornalista sira, hodi haree liu kona-ba liberdade imprensa no espresaun, no mos kapasita jornalista sira kona-ba jurnalismu nian.
Asosiasaun Jornalista Timor Lorosa’e, ne’ebé harii iha loron 22 Dezembru 1999, iha Hotel Turismo. AJTL harii bazeia ba Deklarasaun Turismu ne’ebé asina husí jornalista na’in 60.
Liuhusi komemorasaun Loron Balibo Five ba dala-47 ne’e AJTL kontinua hato’o nia pozisaun katak hahú husi harii AJTL iha 22 loron 22 Dezembru 1999 to’o ohin loron AJTL kontinua firme hodi promove liberdade imprensa no espresaun iha Timor-Leste, tanba ida ne’e mak sai baze fundamental husi direitu umanus.
