Reportajen Umbelina dos Reis
Deputadu Bankada FRETILIN, Felix da Costa hato’o kestaun relasiona ho akontesimentu hetan kilat subar iha Suku Vatuboro ka Loes, Munisípiu Liquisa, hosi eix Komandante Jeral PNTL, Longuinhos Monteiro, nia dehan tenke kondena, no husu órgaun justisa tenke prosesa ho justu ba aktu refere tuir lei.
Deputadu Felix da Costa hatete, rai kilat iha Loes, ne’e hanesan iha tempu Indonézia, ema hamutuk hodi forma Besi Merah. Akontesimentu horseik rai kilat iha Liquiisa, fatin Vatuboro, ne’e hatudu katak kilat iha ita nia rai ida ne’e subar nafatin.
“Se nia dehan ema boot ida merese rai kilat iha nia fatin ka rezidénsia, tanba sá veteranus luta durante 24 anus obedese ba lei bainhira mai husi ai-laran akonpañamentu entrega kilat ba estadu ne’e. Mezmu nia hetan priviléjiu boot iha nasaun ne’e, se nia hetan priviléjiu boot iha nasaun ne’e mak estadu agora la akuza nia ne’e, di’ak liu nasaun ida ne’e sai nasaun terrorista,” kestiona Deputadu Felix.
Nia hato’o, iha komunidade balun informa, dala ruma tuku 12 kalan kilat tarutu, sira hanoin Polísia no F-FDTL mak tiru, maibe realidade kilat ne’e subar. Se dehan nia ema boot, entaun nia eskoltu mak tenke lori la’os tau subar fali, ne’e deskonfia katak atu halo teorizasaun.
Nia husu ba Primeiru Ministru no Prezidente Repúblika, se Prokuradór Jerál la akuza kazu ne’e, ne’e katak Prokuradór Jerál mos ta’uk akuza ema ne’ebé la tuir lei no sala.
“Tanba sá ema kaer de’it katana ameasa, kaer nia hatama ba tuir julgamentu iha tribunal, nune’e se mak subar kilat tenke akuza nia. Di’ak liu maski nia asesór iha Prezidente Repúblika, mais tenke lori nia ba tribunal hodi hatama ba prizaun. Nia hetan priviléjiu boot iha nasaun ne’e sedauk to’o, nia ba subar tan kilat, ne’e terrorista,” nia kestiona liu tan.
Nia informa katak, Sergio Vieira de Mello mak hili Longuinhos sai boot hanesan Prokuradór Jerál ou juis atu investiga kazu sira iha 1999 nian, ohin loron nia boot sai hanesan asesór Prezidente Repúblika, Prokuradór labele ta’uk no tenke kondena nia tuir lei. Nia dehan atu Mari Alkatiri ka Xanana mak halo nafatin kondena tuir lei.
Nia husu ba sidadaun hotu moris iha nasaun ne’e, tenke obedese ba lei no orden ne’ebé vigor iha rai ne’e.
