Reportajen Umbelina dos Reis
Governu Timor-Leste sei kondena sidadaun estranjeiru ne’ebé fa’an hena ho modelu Tais Timor iha territóriu laran, tanba duplika produtu ta’is ne’ebé rekoñese nu’udar na’in ba Timor.
Sekretáriu Estadu Arte Kultura (SEAK), Teofilo Caldas hateten da-dauk ne’e Sidadaun estranjeiru sira fa’an ona hena ne’ebé mak modelu hanesan ho Tais Timor, maibé dekretu lei seidauk kondena ho razaun sei prosesa.
Governante ne’e dehan, dekretu lei ba direitu autór promulga ona husi Prezidente Repúblika iha loron 28 Dezembru, tanba ne’e SEAK hamutuk ho Ministru Ensinu Superior Siénsia Kultura (MESSK) no Ministériu Turizmu, halo planu oinsá halo abertura ba deziminasaun lei direitu do autór, depois kondena ema ne’ebé duplika produtu ruma tanba lei ne’e proteje autór.
Dekretu lei espesífiku ko’alia konaba tais, tanba da-dauk ne’e tais rejista ona iha UNESCO no rekoñese ona iha mundu internasionál na’in mak Timor, nune’e parlamentu sei halo rezolusaun entaun sira prepara dekretu lei nune’e se mak duplika tenke hetan kondenasaun, nia esplika.
Governante informa katak, sei hein dekretu lei ne’ebé vigor mak foin kondena ema ne’ebé duplika produtór do autór. “Ha’u ko’alia hanesan SEAK, maibé dekretu lei ne’e vigor ona mak foin kondena no prosesa ema, se lei ne’e nia prazu seidauk to’o 180 dias halo ba dizeminasaun ne’e seidauk kondena ba ema.”
Governu iha planu halo abertura ba dizeminasaun ho parlamentu komisaun A-G, no membru governu sira hodi hale’u munisípiu 12 inklui RAEOA, hodi tama ona ba vigor hafoin tama ba prosesa. Asaun ne’ebé mak sira halo bele prosesa fali 2024 -2025 kuandu lei ne’e vigor ona.
