Reportajen Umbelina dos Reis
Sorumutu Konsellu Ministru (KM) ho membru governu sira iha tersa-feira (25/01), hodi hala’o reuniaun ko’alia konabá programa distribuisaun sesta bázika, ne’ebé mak populasaun balun seidauk hetan, no mós ko’alia Planu Estratéjiku Nasionál ba Dezenvolvimentu Turizmu (PENDT) 2023-2030.
Ministru Prezidensiál du Konsellu Ministru, Fidelis Leite Magalhães, hatete, hala’o sorumutu ne’e hodi ko’alia konabá aprova projetu ba dekretu lei ne’ebé aprezenta husi Ministru Koordenadór ba Asuntu Ekonómiku, Joaquim Amaral, ho objetivu atu prolonga períodu distribuisaun sesta bázika ne’ebé estabelese ona husi dekretu-lei nú. 10/2022, loron 04 fulan Abril, ne’ebé aprova medida hodi haforsa distribuisaun sesta bázika ba família timoroan sira, ne’ebé presiza no apoiu operadór ekonómiku lokál ou kria rejime espesiál aprovizionamentu iha ámbitu planu rekuperasaun nian.
Alein de ne’e mós nia dehan, projetu rezolusaun governu nian, ne’ebé aprezenta husi Ministru Turizmu, Komersiu no Indústria, José Lucas do Carmo da Silva, ne’ebé aprova Planu Estratéjiku Nasional ba Dezenvolvimentu Turizmu tinan 2023-2030.
“Planu estratéjiku ne’e objetivu atu dezenvolve Timor-Leste hanesan destinu úniku iha Ázia, ho setór turizmu inkluzivu, sustentável no responsavel,” dehan Ministru Prezidensial du Konsellu Ministru, Fidelis Leite Mangalhães ba Jornalista sira iha Palasiu Governu 25/01.
PENDT 2023-2030 ne’e estabelese setór estratéjiku no proposta sira asaun nian ne’ebé governu deside to’o tinan 2030. “Hanoin atu aselera, dinamiza dezenvolvimentu turizmu nasional, iha parseria ho interveniente hotu ne’ebé inklui instituisaun nasionál, sosiedade Sivíl, parseiru dezenvolvimentu no setór privadu.” Ministru Fidelis dehan.
Governante ne’e informa katak, defini setór estratéjiku hamutuk 11, ho área prioritária intervensaun tinan 2023-2030, planu Pluri anual implenta to’o tinan 2030, aprezenta programa atividade prioritária, identifikasaun responsável ho parseiru prinsipal sira.
