Reportajen Umbelina dos Reis
Konsellu Ministru (KM) aprova ona projetu Dekretu-Lei, ne’ebé aprezenta husi Ministra Saúde, Odete Maria Freitas Belo, kona-ba rejime jurídiku substitutu susu-ben inan nian tanba susu-ben inan nian saudável ba labarik iha ita rai.
Ministru Prezidensiál du Konsellu Ministru, Fidelis Leite Magalhães hateten, rejime jurídiku substitutu susu ben inan ne’e importante tanba regula, tau estandarte ba susu-ben formula sira ne’ebé fa’an, ita sosa fo ba bebe sira.
“Tanba susu-ben barak mak agora expire iha merkadu, dala barak mak ema halo promosaun maibé susu-ben ne’ebé fa’an iha merkadu barak mak la iha valor no nutrisaun, tanba dala barak susu-ben fa’an ne’e la’os hahan di’ak ba bebe no labarik sira, tanba ne’e mak governu tau prioridade ba susu-ben inan nian, tanba ita hakarak labarik nia saúde saudável iha ita nia rai rasik, entaun ita tenki regula susu-ben sira ne’ebé atu fo ba bebé no labarik sira ne’ebé infantil, tanba sira mak aban bainrua sai futuru nasaun nian,” dehan Ministru Fidelis, kuarta-feira 25/01.
Nia dehan objetivu husi programa substitutu susu-ben inan ne’e atu regula komersializasaun, informasaun, publisidade no kontrolu ba kualidade produtu sira ne’ebé destina ona, direta ka indireta ba alimentasaun laktente (bebé ne’ebé sei susu) no labarik sira to’o tinan tolu. Nune’e, diploma ne’e prosede ba regulasaun substánsia nutritiva no kritériu sira kompozisaun substituisaun susu-ben inan nian, estabelese regra sira ba ni-nia publisidade, define regra no publisidade, define informasaun, rotulajen no embalajen, no hatudu entidade kompetente hirak mak autoriza ba komersializasaun.
Nia akresenta, konsidera katak susu-ben inan nian mak ai-han ideál ne’ebé importante tebes ba bebé sira ne’ebé foin moris, ba labarik sira nia kreximentu no dezenvolvimentu saudável, bainhira inan sira la fó susu-ben ba labarik, ka halo parsialmente, asegura, kualidade substitutu ba ida-ne’e, maibé mós la interferénsia ni-nia promosaun no distribuisaun ho protesaun ba ai-han inan nian.
Rekomendasaun husi kódigu internasionál Marketing atu substitui susu-ben inan nian no rezolusaun subsekuente sira husi Asembleia Saúde Mundiál.
Projetu Dekretu-Lei ne’e preve kontra ordenasaun entre dolar amerikanu $1000 no $4000, posibilidade iha sansaun sira hanesan lakon objetu pertense sira ba ajente no suspensaun komersializasaun ba produtu.
Preve mós kriasaun Konsellu Nasionál Almamentasaun no Nutrisaun Infantil nian ne’ebé sai hanesan misaun atu apoia governu nian atu define polítika nasionál promosaun no protesaun aleitamentu inan no ai-han infantil nian. Sei atua mos iha promosaun atu sensibiliza ba populasaun kona-ba vantajen sira aleitamentu inan nian no obrigasaun atu halo tuir regra sira kona-ba substituisaun no komplementár inan sira nia susu-ben.
