Reportajen David da Costa
Liuhusi Konsellu Ministru (KM) ohin Governu Timor-Leste aprova ona projetu rezolusaun Governu, hodi suspende Timor-Leste nian desizaun ba Kandidatura Timor-Leste nian ba iha Konsellu Direitus Umanus, Organizasaun Nasoins Unidas (ONU) nian, ba iha Períodu tinan 2024-2026, adota liuhusi rezolusaun governu nina iha dekretu lei númeru 61/2021, loron 12 Maiu.
Iha projetu Rezolusaun Governu, ne’e aprezenta husi Vise Ministru Negósius Estranjeiru no Kooperasaun (MNEK), Julião da Silva.
Ministru Prezidénsia Konsellu Ministru (PCM), Fidelis Manuel Leite Magalhaes, hateten, Iha loron 12 Maiu liu ba, Timor-Leste avansa ho Timor-Leste ninia kandidatura ba Konsellu Direitus Umanus iha ONU, maibé agora Timor-Leste deside atu suspende lai, no atu re-kandidata fali iha tinan 2027 to’o 2029.
Nune’e Timor-Leste aliña ninia pozisaun ho ASEAN nian, ne’ebé hili Republika Indonesia nu’udar Kandidatu úniku ba organizasaun konsellu Direitus Umanus ba períodu tinan 2024-2026, Timor-Leste suspende ninia kandidatura to’o eleisaun Konsellu Direitus Umanus ba Períodu tinan 2027-2029.
“Tanba ita tama iha fase ne’ebé maka la’o ona ba oin avansadu loos, ba iha ita nia adezaun ba iha ASEAN, konforme ASEAN ninia pratika so membru ida deit maka konkorre ba iha knaar sira hanesan ne’e iha rai liur,” dehan Ministru Prezidensia Konsellu Ministru, Fidelis Manuel Leite Magalhaes iha palásiu governu, Kuarta 1/02.
Nia haktuir Indonesia mós assume hela Prezidente rotativa ASEAN nian, sira mós avansa ho sira nia kandiatura, entaun Timor-Leste Deside atu suspende lai no hadia fali iha 2027 no 2029 hodi Indonesia avansa iha iha 2024 no 2026.
