Reportajen Silvino Freitas
Asosiasaun Jornalista Timor Lorosa’e (AJTL) realiza treinamentu kona-ba Digital and Physical safety Seguransa ba fiziku no Dijitál ba jornalista sira ne’ebe mai husi imprime no eletrónika, nune’e bele ajuda hasa’e koñesimentu ba jornalista sira, oinsá kuidadu an iha terenu no uza plataforma dijitál
Iha abertura ne’e Prezidente AJTL Zevonia Vieira hateten, treinamentu foka ba Digital and Physical Safety ne’e atu asegura jornalista sira nia an bainhira halo reportajen iha fatin sira ne’ebe bele mosu risku, no asegura an bainhira uza aplikasaun dijitál sira.
“Liuliu atu asegura ba jornalista sira ne’ebé halo reportajen investigativu, dala-barak ita halo treinamentu tékniku nian konaba jornalizmu ba jornalista sira, konnesementu sira mos importante ba jornalista sira, atu iha hasae sira abilidade atu bele komprende ameasa no risku sira nebe karik bele mosu iha ita nia leet”, dehan Zevonia Vieira iha Fundasaun Haburas, 11/02
Nia hatutan ita moris iha era digital, importante tebes atu komprende aplikasaun sira no sasan elektronika sira ne’ebe ita uza, oinsá bele asegura sasan hirak ne’e, no dadus sira nebe ita rai iha laptop, telefone no plataforma sira ne’ebe uza, ema barak sai vítima bainhira menus konnesementu no ema seluk bele uza salah ba dadus sira, ba grupu ka ema balun nia interese.
Fatin hanesan Diretór Ezekutivu Konsellu Imprensa, Rigoberto Monteiro hateten asuntu digitál no physical safety ne’e parte ida ba kompeténsia ba profisionál jornalista sira nian, importante ba jornalista sira, hodi haklean ba sira nia koñesimentu bainhira hala’o kobertura iha terenu.
“Ita boot sira tenke hatene ona iha kontestu agora besik tempu eleisaun, jornalista sira tenke hatene ona saida mak presiza halo hodi asegura ita nia an iha prosesu kampaña no eleisaun, labele dehan katak fatin hotu seguru maibé iha mós fatin balun ne’ebé bele fo ameasa ba ita nia vida” dehan Rigoberto hafoin halo abertura ba formasaun iha salaun Haburas-Foundation Faról,(11/02).
Nia klarifika formasaun iha buat rua ne’ebé importante tebes, atu jornalista sira presiza hatene ida maka ameasa ba fíziku, no ameasa iha dijitál katak agora iha sosiedade ida ne’e mak boot liu ona, ema hatun ita nia produtu ne’e iha média sosiál, ne’e ameasa ba karakter dezenvolvimentu jornalista sira nian.
“Maski jornalista sira ativu tebes iha investigative, maibé kuandu iha ameasa ruma iha média-sosiál ka dijitál halo ita nia mentál monu, tanba ne’e formasaun ne’e importante tebes no espera katak AJTL bele fo tutan formasaun ne’e ba rádiu komunidade sira hodi hatene asuntu sira ne’e hodi hala’o kobertura” nia dehan.
Treinamentu ne’e realiza tanba parte husi kolaborasaun asosiasaun sira iha sudeste aziátiku mak hanesan Aliansi Jurnalis Independen, Asosiasaun Jornalista Timor Lorosa’e, Gerakan Media Merdeka iha Malaysa (GERAM), National Union of Journalists of the Philippines, Centre for Independent Journalism iha Malaysia no Cambodia Journalists Association, ne’ebe hetan fundus husi Reinu Holanda, Canada no US agency for Global Media
Entretantu formasaun ne’e hala’o iha salaun Haburas-Foundation Faról, durante loron rua 11-12/02 ba jornalista sira no formadór mai husi membru AJTL ne’ebé antes simu ona formasaun iha estranjeiru.
