Reportajen Silvino Freitas
Konsellu Imprensa (KI) sei halo nota entendimentu ho Polisia Nasionál Timor Leste (PNTL) no entidade investigadór sira, hodi fo protesaun no seguransa ne’ebé seguru ba jornalista bainhira hala’o kobertura, no labele krimináliza jornalista sira nia serbisu.
“Buat ne’ebé konsellu imprensa presiza halo mak nota entendimentu ba iha polisia, fo seguransa ba jornalista sira bainhira hala’o kobertura iha terenu fo espasu ne’ebé livre ba jornalista sira, tanba hirak ne’e kompeténsia KI nian atu proteje jornalista sira” dehan Diretór Executivu Konsellu Imprensa Rigoberto Monteiro, hafoin hala’o abertura ba formasaun Digital and Physical Safety iha Haburas-Foundation Faról, (11/02).
Nia dehan, presiza mós hala’o nota entendimentu ho entidade investigadór sira atu entende di’ak profisaun jornalista sira nian, tanba dala-barak saida mak jornalista sira hakerek ne’e ema dehan krimi, tanba iha problema entendimentu de’it maibé produtu jornalista sira nian nunka atu kriminaliza.
“Buat sira ne’e mak ema presiza hatene, ema atu hatene ita mak tenke sensebiliza, ba oin KI sei foka ba buat ne’e atu asegura seguransa ba jornalista sira” nia dehan.
Nia konklui katak iha buat hirak importante ne’e KI seida’uk halo no presiza halo inklui mós produz protokolu ka mata-dalan, hodi fo protesaun ba jornalista sira.
