Reportajen Joselina dos Santos
Organizasaun Naun-Governamental (NGO) Belun hametin nia parseiru ho UN Women liuhusi programa Inisiativa Spotlight ba pillar Polítika no Lejizlasaun no parseira NOSSAL Institute ba Asisténsia Tékniku, ho objetivu atu prevene violasaun hasoru feto no labarik feto, tanba violénsia doméstika hanesan krime públiku, nune’e komunidade sente no haree violénsia doméstika akontese bele halo denúnsia ba parte relevante sira atu hetan solusaun.
Hafoin serimónia, Ofisial Jéneru Peskizadór Organizasaun Naun-Governamental (NGO) Belun, Maria Fatima Sarah hateten, problema Inisiativa spotlight ne’ebé realiza iha tinan kotuk, NGO Belun hola parte liu-liu ba pillar lejislasaun nian ne’ebe halo peskiza ba iha parte implementasaun lei kontra viólensia domestika iha komunidade nia leet, nune’e peskiza kona-ba Norma Sosial haree liu ba impaktu pornografia ba foinsa’e sira.
“Dadus halo aprezentasaun ne’e haree liu ba peskiza impaktu implementasaun lei kontra violensia doméstika nian, ne’ebe kolabora hamutuk ho UN Women ho parseriu sira seluk, hodi halo peskiza kobertura iha munisípiu sira hanesan Bobonaru, Viqueque no Ermera. Iha munisípiu refere iha Postu-Administrativu 6 no Suku 6”, dehan Ofisial Jéneru Peskizadór Organizasaun Naun-Governamental (NGO) Belun, Maria Fatima Sara, hafoin serimónia iha salaun konferénsia Suai Room Timor-Plaza, 30/06.
Nia dehan metodolojia peskiza mak liuhusi diskusaun fokus Group no mos entrevista parseiru implementador sira, nune’e mos diskusaun fokus group ho feto maluk sira. Total entrevista parseiru inplementador hamutuk 40, feto 20 no mane 20, nune’e diskusaun fokus group hamutuk 23 no mos feto maluk sira hamutuk 224.
“Belun mos iha programa A3 ne’e halo monitorizasaun ba insidente hirak ne’ebé akontese, entaun husi dadus sira ne’ebe iha katak númeru violénsia doméstika ne’e aas, nune’e mos husi implementasaun programa Inisiativa Spotlight iha pillar 6, tanba ne’e Belun hola parte iha primeiru ne’e haree liu ba prevensaun violénsia hasoru feto no labarik feto, tanba ne’e ita hatene katak lei kontra violénsia doméstika nia eziste 2010, oinsá ita haree nia impaktu ba komunidade sira”, nia informa.
Nia hatutan razaun hirak ne’e mak Belun hola parte, hodi halo peskiza. Husi monitorizasaun ne’ebé Belun hala’o iha munisípiu 13, maibé bazeia ba obstákulu ne’ebé Belun hasoru, daudaun ne’e foku liu ba munisípiu tolu hanesan Díli, Bobonaro no Covalima.
