Reportajen Silvino Freitas
Prezidente Repúblika, Dr. José Ramos Horta klarifika ninia vizita ba munisípiu Baucau, nu’udar parte husi agradesimentu ba nia apoiante sira ne’ebé durante ne’e, fo apoiu ba nia kandidatura hahú husi mandatu 2007 no 2022. Alende ne’e nia mós ezije ona investigasaun ba karreta prezidénsia ne’ebé tula atributu CNRT.
Ramos Horta hateten, polítika balun mak kestiona ba ninia vizita iha Baucau, maibé nia la’ós ba tuir kampaña, hala’o vizita ida iha Baucau tanba iha apoiante sira lubuk ida dezde mandatu dahuluk iha 2007 nian.
“Ha’u mak hakarak ba, tinan ida besik ona atu ba agradese sira, enkontru ne’e la’ós konsolidasaun, sira halo duni maibé maun boot Xanana mós la mosu tan” dehan PR Horta iha CCD, (11/04).
Nia dehan apoiante sira ne’e mai husi FRETILIN, PLP no grupu lubuk ida ne’ebé nia ba, atu agradese de’it iha oras balun nia laran, maibé iha polítika balun ne’ebé stress dehan ba bok sira nia knuuk, maibé nia ba atu agradese ba nia apoiante sira.
“Ha’u ba iha meia hora de tempu atu agradese maibé politika balun ne’ebé estres, dehan Ó ba Baucau ne’e halo saida ba book ami nia knuuk iha ne’ebá, hau la book ha’u ba agradese ema, vizita ne’e nia halo iha villa laran hodi sosa ema nia hahan, modo, ai-fuan no iha karreta ki’ik ne’e nakonu ho produtu Baucau nian” dehan PR Horta.
Iha loron hirak liuba imajen Prezidente Republika nian viral iha media sosial bainhira Prezidente vizita Baucau no hasoru malu ih militante no estrutura partidu CNRT ne’ebe halo hela atividade konsilidasaun iha munisipiu, no hamosu pro no kontra ba imajen refere.
