Reportajen Silvino Freitas
Perfurasaun mina-matan iha possu Weda’a Suai Covalima remata ona ho profunidade 3.1 kilometru, hodi hein prosesu teste ba viabilidade komersiál hafoin halo esplorasaun tuir proposta kompaña nian.
Ministru Petróleu no Minerais (MPM), Victor Soares hateten perfurasaun mina iha possu Weda’a konklui ona ho profunidade 3.1 kilometru ne’e maka progresu ne’ebé empreza atinje ona.
“Karik ida ne’e mak nia tarjetu ona entaun sira bele hala’o relatóriu, hodi teste nune’e bele hatene katak mina ne’e komersialmente viable halo esplorasaun, empreza mak sei deside hodi relata ba ANPM” dehan Victor ba jornalista sira iha salaun Ministériu Finansa Aitarak laran, (14/04).
Fatin hanesan Prezidente Autoridade Nasionál Petroleu no Minerais (ANPM) Florentino Ferreira klarifika katak, perfurasaun iha possu Weda’a ne’e ramata ona nune’e sei halo uluk teste ba possu refere depois ba fali possu Liurai.
“Possu ne’e maka sira halo hotu ona teste, teste lós ona ami sei halo deklarasaun hamutuk ho empreza karak ita iha deskobrimentu mina ho kuantidade komersiál iha rai-maran no prontu dezenvolve tuir proposta kompaña nian” nia konklui.
