Reportajen Umbelina dos Reis
Forum Organizasaun Naun-Governamental Timor-Leste (FONGTIL), hamutuk ho OXFAM Timor-Leste no Servisu de Apoiu a Sosiedade Civil e Auditorio Sosiál (SASCAS) lansa Sentru Informasaun ba observasaun Eleisaun Parlamentár 2023 ba partidu polítiku (ParPol) sira, durante sira nia períodu kampaña eleitorál.
Diretór Ezekutivu FONGTIL, Valentino da Costa Pinto hateten FONGTIL estabelese Sentru Informasaun Eleisaun Parlamentár 2023 nian ne’e, hodi fó espasu ba membru organizasaun sosiedade sivil ka ONG hotu, bele halo observasaun ba atividade kampaña eleitorál. Sentru informasaun ida ne’e mós sei prienxe atividade diálogu no talkshow ba reprezentante sira, mai hosi partidu polítiku hodi ko’alia saida mak sira sei halo bainhira hetan fiar hosi povu.
“Sentru informasaun ne’e sei funsiona durante kampaña eleitorál iha parlamentár nian, ne’ebé sei permite membru sira iha munisípiu, nune’e membru sira relata mai nasionál durante kampaña eleisaun saída mak akontese iha baze no ami sei oferese informasaun ba públiku kada loron segunda-feira, konaba deskobrimentu ne’ebé durante partidu polítiku sira halo iha terenu”, dehan Diretór Ezekutivu FONGTIL, Valentim da Costa Pinto ba Jornalista sira iha Salaun FONGTIL, Kaikoli, 18/04.
Nia informa katak membru FONGTIL hetan ona karta kredensiál hosi STAE, nune’e bele asesu ba halo observasaun voluntariamente ba partidu polítiku sira durante periodu kampaña. Membru FONGTIL hamutuk 100 resin mak sei dezloka ba iha munísipiu 12 inklui RAEOA, no mós membru FONGTIL 100 pesoas iha Díli mak sei halo observasaun voluntariamente ba partidu polítiku durante kampaña eleitorál.
Iha fatin hanesan Diretora STAE, Julia Onorina hateten, agora laiha alterasaun somente ba funsionáriu públiku no ajente estadu mak apoiu servisu direita ba prosesu eleisaun, no iha loron eleisaun mak bele ba vota iha fatin ne’ebé hala’o knaar ba.
Ba observadór nasionál sira ne’ebé pertensiál, nia bele ba vota iha fatin ne’ebé sira servisu ba, no tenke aprezenta kartaun eleitoral, se laiha kartaun eleitoral bele uza BI ou Passaporte maibé naran tenke iha lista votantes.
Nia salienta, iha tinan 2022 ita iha monitorizasaun no observasaun maibé eleisaun parlamentár 2023 sei laiha tan monitorizasaun maibé komu la altera lei signifika ba observasaun de’it no monitorizasaun sei la eziste, inklui iha sentru votasaun paralelu sira.
“Konabá sidadaun sira ne’ebé hala’o estudu iha estranjeiru hanesan Indonézia, Filipina ne’e desizaun iha governu, tanba STAE no CNE bainhira halo negosiasaun ein termus de koperasaun, tanba resensiamentu ne’e obrigatóriu, eleisaun ne’e dever síviku. Tinan ne’e STAE hahú loke resensiamentu hosi Austrália, Portugál, Inglatera, Irlándia no Korea, mas Filipina no Indonézia laiha,” Nia dehan.
Lansamentu sentru informasaun ne’e hetan apoiu fundu hosi Oxfam iha Timor-Leste $6000 resin no mós fundu hosi SASCAS US $500.Fundu hirak ne’e oinsá mak bele jere ba iha atividade sira durante tempu kampaña eleitóral nian.
